Shymkent áýejaıynda eski ushý-qoný jolaǵy reısterge kedergi keltirdi

ShYMKENT. KAZINFORM – Ushý-qoný jolaǵynyń tehnıkalyq shekteýleri saldarynan Shymkent áýejaıynda reıster jıi keshigip, toqtatylǵan.

Shymkent halyqaralyq áýejaıynda quny 40 mlrd teńgeden asatyn jańa ushý-qoný jolaǵyn salý jobasy júzege asyp jatyr. Qazirgi qoldanystaǵy ushý-qoný jolaǵy shamamen 50 jyl buryn paıdalanýǵa berilgen. Onyń jóndeý kórmegenine de 20 jylǵa jýyqtaǵan.

Qalalyq jolaýshylar kóligi jáne avtomobıl joldary basqarmasynyń málimetinshe, sońǵy kúrdeli jóndeý jumystary 2007 jyly júrgizilgen. Kezekti jańǵyrtý jumystary 2027 jylǵa josparlanǵan edi. Alaıda bul jaǵdaıda áýejaı jumysynyń uzaq ýaqytqa toqtap qalý qaýpi týyndaǵan.

«Qazaqstannyń avıatsııalyq ákimshiligi» AQ talaptaryna saı eski ushý-qoný jolaǵyn 300 metrge uzartý qajettigi qarastyrylǵan. Degenmen mundaı jumystarǵa shamamen 10 mlrd teńge qajet, al áýejaıdyń sanıtarlyq aımaǵynda ornalasqan 308 nysandy memleket qajetine satyp alý úshin qosymsha 30 mlrd teńgeden astam qarjy jumsaý kerek bolatyn. Osy faktorlar jańa jobaǵa basymdyq berýge negiz boldy.

Sonymen qatar qazirgi ushý-qoný jolaǵy turǵyn úılerge tym jaqyn ornalasqandyqtan, buǵan deıin birqatar reısterge shekteý qoıylǵan. Al jańa jolaq turǵyn úılerden alys aýmaqta salynyp jatyr.

– Jańa jolaqtyń uzyndyǵy 3 500 metr, eni 60 metr bolady jáne IKAO-nyń ІІІ sanatyna sáıkes salynady. Sondaı-aq ІІІ sanattaǵy joǵary qarqyndy jaryq-sıgnaldyq jabdyq ornatylady. Bul áýejaıǵa aýa raıy qolaısyz, tipti nóldik kóriný jaǵdaıynda da áýe kemelerin qabyldaýǵa múmkindik beredi, - delingen vedomstvonyń usynǵan jaýabynda.

Qazirgi ýaqytta áýejaıda tek І sanatty jaryq-sıgnaldyq jabdyq qoldanylyp keledi. Máselen, 2023 jyly tuman saldarynan reısterdiń shamamen 30 paıyzy toqtatylǵan, keshiktirilgen. Jańa ushý-qoný jolaǵynyń tózimdilik kórsetkishi endi 1,6 ese artyp, joǵary salmaqty júk jáne zamanaýı jolaýshy ushaqtaryn eshqandaı shekteýsiz qabyldaýǵa jol ashady. Jalpy qurylys jumystaryn 2027 jyldyń sońyna deıin aıaqtaý josparlanǵan.

Joba avıatsııa salasymen ǵana shektelmeıdi. Bolashaqta áýe, temirjol jáne saýda baǵyttaryn biriktiretin iri logıstıkalyq ortalyq qurý kózdelip otyr.

Budan buryn Shymkent qalasyndaǵy áýejaıdyń sanıtarlyq qorǵaý aımaǵynda ornalasqan nysandarǵa qatysty sheshimi ózgergenin jazǵan edik. 

Sonymen qatar jobanyń qurylysyn júzege asyratyn merdiger anyqtalǵanyn habarlaǵan bolatynbyz.