Shymkent áýejaıy Eýropanyń derekter bazasyna engizildi
ASTANA. KAZINFORM — Shymkent halyqaralyq áýejaıy júk tasymaldaý salasynda Eýropalyq odaqtyń qatań avıatsııalyq qaýipsizdik talaptaryna tolyq sáıkes keletinin rastaıtyn sertıfıkatty aldy. Bul týraly qala ákimdiginiń resmı saıty málim etti.
Áýejaı RA3 (Regulated Agent Third Country) mártebesine ıe boldy.
Áýejaıǵa KZ/RA3/00004-01 degen biregeı tirkeý nómiri berilip, resmı túrde Eýropanyń RA3 derekter bazasyna engizildi. Osy mártebe Eýropa elderine tikeleı júk tasymaldaýdy tranzıttik beketterde qosymsha tekserýsiz júzege asyrýǵa múmkindik beredi.
— Bul júk jetkizý ýaqytyn jedeldetip, logıstıkalyq tizbekterdi jeńildetýge, seriktesterdiń ýaqyttyq jáne qarjylyq shyǵyndaryn azaıtýǵa, sondaı-aq qalanyń halyqaralyq áýe tasymaldaýshylar men logıstıkalyq kompanııalar úshin tartymdylyǵyn arttyrýǵa jol ashady.
Shymkent úshin bul oqıǵanyń strategııalyq mańyzy zor. Jańa mártebe áýejaıdyń Ortalyq Azııadaǵy iri júk habtarynyń biri retindegi ornyn nyǵaıtyp, sheteldik áýe kompanııalarymen yntymaqtastyq aıasyn keńeıtedi jáne Qazaqstannyń syrtqy ekonomıkalyq baılanystaryn damytýǵa jańa múmkindikter týǵyzady, — delingen habarlamada.
RA3 sertıfıkatyn alý — Qazaqstannyń halyqaralyq kólik jáne saýda dálizderine yqpaldasý jolyndaǵy mańyzdy qadam sanalady. Sonymen qatar ol óńirdiń ınvestıtsııalyq jáne iskerlik tartymdylyǵyn arttyrýǵa yqpal etedi.
Budan bólek, Shymkent áýejaıynda ekinshi ushý-qoný jolaǵy salynady. Joba — áýejaıdy halyqaralyq deńgeıdegi zamanaýı mýltımodaldy habqa aınaldyrý baǵdarlamasynyń mańyzdy bóligi.
Jańa jolaqtyń uzyndyǵy — 3500 metr, eni — 60 metr bolady. PSN-80 sanatyndaǵy tósemniń beriktigi joǵary júk kóterimdi áýe kemelerin qabyldaýǵa múmkindik beredi.
Halyqaralyq qaýipsizdik standarttaryna sáıkestikke erekshe nazar aýdarylǵan. Jolaq shekteýli nemese múlde kórinbeıtin jaǵdaıda da áýe kemelerin qabyldaýǵa múmkindik beretin júıelermen jabdyqtalady. Bul áýe qatynasynyń turaqtylyǵy men senimdiligin aıtarlyqtaı arttyrady.
Buǵan deıin Qazaqstan áýejaılarynda jańa ereje kúshine enetini týraly jazdyq.
Sondaı-aq Arqalyq áýejaıynan Astana, Almaty jáne Qostanaıǵa reıster ashylatyny týraly jazǵan bolatynbyz.