Shymkent áleýmettik-ekonomıkalyq turǵydan qalaı damyp jatyr
ShYMKENT. KAZINFORM — 2025 jyly Shymkent qalasynda áleýmettik qoldaý sharalaryn kúsheıtý, kásipkerlikti damytý, týrızm men kreatıvti ındýstrııany ilgeriletý, tsıfrlandyrý men jasandy ıntellektti engizý, sondaı-aq ınvestıtsııalar tartý men ónerkásip óndirisin arttyrý baǵyttarynda aýqymdy jumystar júrgizilýde.
Áleýmettik qoldaý sharalary
Áleýmettik osal sanattaǵy azamattardy qoldaý maqsatynda 2025 jyly 333-ten astam turǵynǵa óteýsiz memlekettik granttar berildi. Bul qarjy jeke kásipkerlikpen aınalysýǵa múmkindik berip, árbir qatysýshyǵa 400 aılyq eseptik kórsetkish mólsherinde (1 572 800 teńge) usynyldy. Jalpy 1756 ótinish qabyldanyp, komıssııa sheshimimen 336 azamat grant ıegeri atandy. Qarjy 333 adamǵa aýdaryldy, al eki azamattyń esepshottary buǵattalýyna baılanysty granttan bas tartýyna týra keldi.
Birinshi lek boıynsha 134 azamat; onyń ishinde 65 jeke kásipker, 69 jumyssyz, ekinshi lek boıynsha 199 azamat; onyń ishinde 101 jeke kásipker, 98 jumyssyz qoldaýǵa ıe boldy. Grant ıegerleri qatarynda kópbalaly otbasylar 192 adam, múgedektigi bar azamattar 51 adam, múmkindigi shekteýli balany tárbıelep otyrǵandar 59 adam, asyraýshysynan aıyrylǵandar 22 adam jáne ataýly áleýmettik kómek alýshylar 9 adam bar.
Jobalar qyzmet kórsetý boıynsha 151 joba; onyń ishinde óndiris 53 joba, kondıterlik jáne nan ónimderi 37 joba, tigin óndirisi 35 joba, jartylaı daıyn ónimder 24 joba, mal jáne qus sharýashylyǵy 12 joba syndy baǵyttarda júzege asyrylýda. Memlekettik granttar azamattardyń tabysyn arttyryp, qalanyń áleýmettik-ekonomıkalyq damýyna oń áser etýde. Sonymen qatar, qarjynyń tıimdi ári maqsatty jumsalýyn baqylaý maqsatynda Eńbek mobıldiligi ortalyǵynda arnaıy monıtorıng toby jumys isteıdi.
Týrızm men kreatıvti ındýstrııa
Qalanyń áleýmettik-ekonomıkalyq damýynda týrızm men kreatıvti ındýstrııa mańyzdy ról atqarady. Shymkent elimizdegi iri megapolıstiń biri retinde týrıstik áleýetin arttyryp, ishki jáne halyqaralyq týrızmdi damytýǵa basa nazar aýdarýda. Qala aýmaǵynda ornalasqan mádenı-tarıhı nysandar men zamanaýı ınfraqurylym týrısterdiń qyzyǵýshylyǵyn arttyrýda.
Kreatıvti ındýstrııa salasynda jańa jobalar qolǵa alynyp, jas kásipkerler men shyǵarmashylyq tulǵalarǵa qolaıly jaǵdaı jasalýda. Bul baǵytta túrli is-sharalar uıymdastyrylyp, shyǵarmashylyq áleýeti bar azamattardy qoldaýǵa arnalǵan alańdar ashylýda.
Tsıfrlandyrý jáne jasandy ıntellekt
Shymkent qalasynda tsıfrlyq ekojúıeni damytý sheńberinde memlekettik qyzmetterdiń basym bóligi onlaın formatqa kóshirildi. Jasandy ıntellekt tehnologııalary bilim berý, densaýlyq saqtaý jáne qoǵamdyq qaýipsizdik salalarynda qoldanys tabýda. Bul óz kezeginde megapolıstiń tehnologııalyq serpinin arttyryp, turǵyndardyń ómir súrý sapasyn jaqsartýǵa yqpal etýde.
Investıtsııalar men ónerkásip
Qala ekonomıkasyn ártaraptandyrý jáne turaqty ósýin qamtamasyz etý maqsatynda ınvestıtsııalar tartý men ónerkásiptik jobalardy júzege asyrý baǵytynda júıeli jumystar júrgizilýde. Jańa óndiris oryndary ashylyp, óńdeý ónerkásibinde birqatar jobalar iske qosyldy.
Investorlar úshin qolaıly jaǵdaılar jasalyp, taǵam ónerkásibi, tigin jáne jıhaz jasaý, sýsyndar óndirý, jartylaı daıyn ónimder shyǵarý syndy salalarda belsendi ınvestıtsııalyq jobalar júzege asýda. Bul óz kezeginde jańa jumys oryndaryn qurýǵa jáne qalanyń ekonomıkalyq turaqtylyǵyn arttyrýǵa jol ashýda.
Shymkent qalasynyń 2025 jylǵy áleýmettik-ekonomıkalyq damýy halyqtyń ómir súrý sapasyn arttyrýǵa, kásipkerlikti qoldaýǵa, ınvestıtsııalyq tartymdylyqty kúsheıtýge jáne halyqaralyq yntymaqtastyqty damytýǵa baǵyttalǵan. Qolǵa alynǵan bastamalar megapolıstiń ınnovatsııalyq damý jolyn aıqyndap, turǵyndardyń ál-aýqatyn jaqsartýǵa naqty múmkindik berýde.