Shymkent ákiminiń eks-orynbasaryna sot úkimi shyqty
ShYMKENT. KAZINFORM - Shymkent qalasy ákiminiń burynǵy orynbasary Maqsut Isahovqa qatysty sot úkimi shyqty. Eks-sheneýnikke laýazymdy qyzmetti atqaryp júrgende Ulttyq qaýipsizdik komıtetiniń Shymkent qalalyq departamenti basshysynyń birinshi orynbasaryna para berýge oqtaldy degen aıyp taǵyldy.
Úkim Shymkent qalasynyń qylmystyń ister jónindegi mamandandyrylǵan aýdanaralyq sotynda oqyldy.
Sot otyrysynda sottalýshy óz kinásin moıyndamady. Onyń qorǵaýshysy qylmystyń quramy bolmaýyna baılanysty Maqsut Isahovty aqtaýdy surady. Alaıda memlekettik aıytpaýshy eks-sheneýnikke qatysty qozǵalǵan isti asa iri mólsherde para berýge oqtalý dep ózgertip, oǵan 8 jyl 5 aı bas bostandyǵynan aıyrý jazasyn taǵaıyndaýdy surady.
Sot materıaldaryna sáıkes, Maqsut Isahovtyń kinási dáleldendi.
«Jaza taǵaıyndaý barysynda sot sottalýshynyń qylmystyq jaýapkershiligin jeńildetetin mán-jaılar retinde asyraýynda jasóspirim balalarynyń bolýyn nazarǵa aldy, aýyrlatatyn mán-jaılar is boıynsha anyqtalmady. Sot qylmystyq kodekstiń 55-babynyń 2-bóligin, 56-babynyń 3-bóligin qoldana otyryp, memlekettik qyzmette laýazymdardy atqarý quqyǵynan ómir boıyna aıyra otyryp, 8 jyl 5 aı 7 kúnge bas bostandyǵynan aıyrý jazasyn taǵaıyndady. Odan bólek, Qazaqstan Respýblıkasy Prezıdentine memlekettik nagrada «Qurmet» ordeninen aıyrý týraly usynys engizildi»,-delingen Shymkent qalasy qylmystyq ister jónindegi mamandandyrylǵan aýdanaralyq sotynyń málimetinde.
Aıta keteıik, sot úkimi zańdy kúshine engen joq.
Eske salsaq, Maqsut Isahov ótken jyldyń shilde aıynda qamaýǵa alyndy.
Qylmystyq is boıynsha aıyptaý aktisine sáıkes, 2020 jyly qaladaǵy jylý qubyryn jóndeý úshin ótkizilgen tenderge baılanysty daý týǵan. Tenderdi jeńip alǵan qurylys kompanııasy ákimniń birinshi orynbasarynyń ústinen Ulttyq qaýipsizdik komıtetine shaǵym túsirip, qylmystyq is qozǵalǵan. Alaıda bul isti jabý úshin Maqsut Isahov Ulttyq qaýipsizdik komıteti Shymkent qalasy boıynsha departamenti basshysynyń birinshi orynbasary Manat Sarbasovqa 200 myń dollar kóleminde para berýge oqtalǵan.
Maqsut Isahov Shymkent ákiminiń orynbasary laýazymyna 2020 jyldyń aqpanynda taǵaıyndalǵan.
