Shymkent ákimdiginiń resmı ókili tegin balmuzdaq taratyp, qamalǵan kásipkerge qatysty pikir bildirdi

ShYMKENT. KAZINFORM – Sársen Quranbektiń aıtýynsha, balmuzdaqty laqtyryp taratqan kásipker qoǵam men taǵamǵa qurmetsizdik kórsetken.

– Eshqandaı nárseni tegin taratýǵa bolmaıdy. Prezıdentimiz «Zań men tártip» qaǵıdatyn ustaný kerektigin naqty aıtty. Biz de osyny basshylyqqa alýymyz kerek. Quqyq qorǵaý organdary bul oqıǵany tolyq zerttep, usaq buzaqylyq retinde baǵalady. Sonyń nátıjesinde kásipker 5 táýlikke qamalyp, aıyppul tóleıtin boldy, – dedi Sársen Quranbek.

Sonymen qatar ákim orynbasary quqyq qorǵaý organdarynyń sheshimin durys dep baǵalaıtynyn jetkizdi. Sondaı-aq, ol usaq buzaqylyqtyń da jazasyz qalmaıtynyn eskertti.

– Usaq buzaqylyqqa barǵan adam eń az degende 5 kúnge qamalýy múmkin, tipti kóbirek bolýy da yqtımal. Quqyq qorǵaý organdary mundaı áreketterdi jiti baqylap otyr. Eger qurbandyq shalynsa, ol tıisti mekenjaılarǵa jetkizilip, laıyqty túrde taratylýy kerek. Al ıtke súıek laqtyrǵandaı áreketke barǵan adam zań aldynda jaýapkershilikke tartylady, – dedi ol.

Aıta keteıik, budan buryn Shymkentte tegin balmuzdaq taratqan kásipker qamaýǵa alynǵan bolatyn. Oqıǵa 1 maýsym kúni Turan-2 shaǵynaýdanyndaǵy «Jańalyq» sýpermarketiniń janynda boldy.