Shymkent ákimdigi jedel járdemdi jańǵyrtýǵa 2 mlrd teńgeni artyq jumsaǵysy kelgen
ShYMKENT. KAZINFORM — Shymkentte bıýdjet qarajatyn maqsatsyz ıgerýdiń aldyn alýǵa baǵyttalǵan jumystar jalǵasyp jatyr.
Bul týraly Sybaılas jemqorlyqqa qarsy is-qımyl agenttiginiń Shymkent qalasy boıynsha departamentiniń basshysy Dáýren Erǵarın málimdedi.
Shymkent qalasynda jedel medıtsınalyq kómekti jańǵyrtýǵa 2019 jyly jergilikti bıýdjetten 9,6 mlrd teńge bólingen bolatyn.
Aıaqtalǵan sotqa deıingi is júrgizý aıasynda memlekettik-jekeshelik áriptestik jobasynyń quny asyra baǵalanǵany anyqtaldy.
Sybaılas jemqorlyqqa qarsy is-qımyl agenttiginiń Shymkent qalasy boıynsha departamentiniń usynymy boıynsha ákimdiktiń beıindi basqarmasy sotqa tıisti talap qoıýǵa bastamashylyq jasap, bıylǵy jyldyń 14 naýryzynda jobanyń qunyn 2,1 mlrd teńgege tómendetti.
«Sot sheshimi zańdy kúshine engen joq. Osy baǵyttaǵy jumys jalǵasyp jatyr» dep jazdy Facebook paraqshasynda Dáýren Erǵarın.
