Shymkent ákimdigi jalǵan aqparat taratqandarǵa shara qoldana bastady
ShYMKENT. KAZINFORM — Shymkent qalasynda áleýmettik jeliler arqyly taraǵan jalǵan aqparattar boıynsha quqyq qorǵaý organdary naqty sharalar qabyldaı bastady.
Shymkent qalalyq polıtsııa departamenti basshysynyń birinshi orynbasary Arman Beısenbaevtyń aıtýynsha, qalalyq sý qubyry jáne kanalızatsııa basqarmasy tarapynan áleýmettik jelilerde jarııalanǵan birqatar aqparattarǵa baılanysty polıtsııa departamentine resmı túrde qatynas hat túsken. Atalǵan hat negizinde fılologııalyq saraptama taǵaıyndalyp, Qylmystyq kodeksiniń 274-baby «Kórineý jalǵan aqparat taratý» boıynsha qylmystyq is qozǵalǵan.
— Saraptama qorytyndysyna sáıkes, qylmys quramynyń bolmaýyna baılanysty is qylmystyq emes, ákimshilik sıpatta qaralýda. Qazirgi tańda Eńbekshi aýdandyq polıtsııa basqarmasynda ákimshilik is júrgizilip jatyr. Barlyq tekserý amaly aıaqtalǵan soń, is ákimshilik sotqa joldanatyn bolady. Sońǵy sheshimdi sot shyǵarady, — dedi Arman Beısenbaev.
Bul máselege qatysty Shymkent qalasy ákiminiń orynbasary Sársen Quranbek te pikir bildirdi.
— Qalalyq sý qubyry jáne kanalızatsııa basqarmasy óz quqyqtaryn qorǵaý maqsatynda aryz joldady. Fılologııalyq saraptama barysynda naqty jalǵan aqparat taratylǵany, kórineý jala jabylǵany dáleldendi. Osy boıynsha is júrip jatyr. Biz, ákimdik retinde, kez kelgen memlekettik mekemege jala jabylǵan jaǵdaıda tıisti shara qoldanamyz jáne óz quqyǵymyzdy qorǵaımyz. Al, qoǵam aldynda ashyqpyz, halyqpen jáne BAQ ókilderimen ashyq jumys isteýge daıynbyz, — dedi ol.
Aıta ketý kerek, buǵan deıin áleýmettik jelide Shymkent qalasynyń ákimi týraly syn pikirler jarııalanyp, onyń qyzmetine baılanysty ártúrli baǵalar berilgen bolatyn. Máselen, áleýmettik jeli qoldanýshysy jeke úıiniń qaqpasyna qaraı jol tósep berýdi suraǵan. Sol talaby oryndalmaǵan soń qala basshysyn «eń laıyqsyz ákim» dep baǵalaǵan.
— Ákimniń jumysy bireýdiń jeke úıine baratyn jol salyp berýmen baǵalana ma, joq álde kópshilikke ortaq qolaıly jaǵdaı jasaýmen baǵalana ma? Bul jaǵdaıdy da oılaný kerek. Jalpy ákimniń jumysyn baǵalaıtyn eń joǵary laýazymdy tulǵa bar. Bul sol kisiniń quzyrynda. Al, memlekettik qyzmetkerlerdiń jumysyn baǵalaý — arnaıy ýákiletti organdar men joǵary laýazymdy tulǵalardyń quzyrynda, — dedi Sársen Quranbek.
Aıta keteıik, budan buryn ákimdik Shymkenttegi qurylys jumystaryn eki kompanııa bólip alǵany jaıyndaǵy aqparattyń jalǵan ekendigin málimdegen bolatyn.