Shymkent ákimdigi «Toı Dýman» festıvaline 300 mln teńge bólgeni ras pa
ShYMKENT. KAZINFORM – Ákimdik tek tehnıkalyq qoldaý kórsetedi, al negizgi shyǵyndy «Toı Dýman» teleradıo korporatsııasy óz mindetine alǵan. Bul týraly Shymkent qalasy ákiminiń orynbasary Sársen Quranbek málimdedi.
Resmı ókildiń aıtýynsha, áleýmettik jelilerde tarap jatqan «Shymkenttiń qala kúnine oraı ótetin «Toı dýman» festıvaline 300 mln teńge bólindi» degen aqparat negizsiz.
«Bul – jalǵan aqparat. Jalpy joba ekijaqty kelisim arqyly júzege asyp jatyr. Buǵan deıin de «Toı Dýman» teleradıo korporatsııasy basqa óńirlerde osyndaı jobalardy ótkizgen. Shymkentte alǵash ret ótkeli otyr. Shara barysynda qaýipsizdik, qoǵamdyq tártip, alań daıyndaý, sahna ornatý sekildi tehnıkalyq jáne uıymdastyrýshylyq jumystardy qala ákimdigi qamtamasyz etedi. Al, negizgi shyǵyn tutasymen teleradıo korporatsııanyń moınynda. Bul qala úshin jaǵymdy dúnıe. Ánshi kimniń esebinen keledi, oǵan qalamaqyny kim tóleıdi, bizdiń máselemiz emes», – dedi ol.
Sársen Quranbek qala kúnine arnalǵan merekelik baǵdarlamanyń mazmunymen de bólisti. 10 kúnge sozylatyn is-sharalar ishinde qol óner sheberleriniń kórmesi men orkestrler sherýi bar.
Oǵan elimizdiń ár aımaǵynan kelgen shyǵarmashylyq ujymdar qatysady. «Shymkent – qyzǵaldaqtar qalasy» atty halyqaralyq sýretshiler sımpozıýmy uıymdastyrylady. Al, saltanatty rásimde «Shymkent qalasynyń qurmetti azamaty» ataǵy beriledi. Sondaı-aq, qala turǵyndary elimizdiń óner juldyzdarynyń qatysýymen ótetin gala-kontsert pen «Toı Dýman FEST» is-sharasyn tamashalaıdy.
Qala ákiminiń resmı ókili mádenıet salasynda bólingen 388 mln teńgege 12 is-sharany bir merdiger kompanııa uıymdastyrý mindetin alǵanyn aıtty. Ol jyl basynan aıaǵyna deıinge barlyq is-sharany ótkizetin bolady.
«Naýryz, 7-9 mamyr, Memlekettik rámizder kúni, Qala kúni, Konstıtýtsııa kúni, Respýblıka kúni, Táýelsizdik kúni – osynyń bári sol qarajat esebinen júzege asady. Bul shyǵyndardyń ishinde sahna men bezendirý jumystary da bar. Sondyqtan «300 mln teńge Toı Dýmanǵa bólindi» degen sóz shyndyqqa janaspaıdy», – dep naqtylady Sársen Quranbek.
Aıta keteıik, budan buryn Shymkentte taksıdi taspen urǵan boıjetken qamaýǵa alynǵanyn jazǵan bolatynbyz.