Shymkent ákimdigi Naýryzǵa arnalǵan rolıkterge jumsalǵan qarajatqa qatysty túsinik berdi
ShYMKENT. KAZINFORM – Aqparat keńistiginde Naýryz merekesin atap ótýge baılanysty Shymkent qalasyndaǵy LED-ekrandarda beınerolıkter ornalastyrýǵa 7 mln teńgeden astam qarajat bólindi degen málimet tarady. Birqatar ınternet-resýrs bul shyǵyndy synǵa alǵan materıaldar jarııalady.
Shymkent qalasy ákimdiginiń ishki saıasat basqarmasy memlekettik satyp alý barysynda zań buzý bolýy múmkin degen aqparattyń shyndyqqa sáıkes kelmeıtinin málimdedi.
– Atalǵan qyzmet boıynsha memlekettik satyp alý rásimderi zań talaptaryna tolyq sáıkes ótkizilgen. Nátıjesinde eń tómen baǵa usynǵan «Eldorado» jarnama agenttigi» JShS jeńimpaz atandy, - dep habarlady ákimdik.
Qala basshylyǵynyń málimetinshe, jasalǵan kelisimsharttyń jalpy somasy – 5 mln 431 myń teńge. Joba aıasynda keminde 36 myń beınematerıal kórsetilimi josparlanǵan, ıaǵnı bir kórsetilimniń quny – 151 teńge. Sondaı-aq baıqaýǵa qatysýshylarǵa qoıylǵan talaptyń biri – keminde 300 sharshy metr kólemindegi LED-ekrandardyń bolýy jáne bul talap merdiger tarapynan tolyq oryndalǵany atap ótildi.
– Shymkent qalasyndaǵy 100 LED-ekranda Naýryz merekesine arnalǵan 10 beınerolık kórsetildi. Paıdalanylǵan ekrandardyń jalpy aýdany belgilengen 300 sharshy metrden áldeqaıda asyp túsedi. Bul rette, zań buzýshylyqtar týraly aqparat negizsiz, - dep naqtylady ishki saıasat basqarmasy.
Budan buryn Shymkent ákimdigi jelide taraǵan aýdan ákiminiń qyzmetkerge qol kótergeni týraly vıdeoǵa túsinik bergen edi.
