Shymkent ákimi orynbasaryna jasalǵan shabýylǵa qatysty málimetterdi tergeý naqtylaıdy - Sársen Quranbek

ShYMKENT. KAZINFORM - Qazir tergeý amaldary júrip jatyr. Prokýratýra tarapynan baqylaýda.

Shymkent qalasy ákiminiń orynbasary Rýslan Berdenovke jasalǵan qarýly shabýyl kezinde qala ákimi men orynbasarlary jáne apparat basshysy jumysta bolǵan. Bul týraly qala ákimdiginiń resmı ókili Sársen Quranbek aıtty.

- Oqıǵa bolǵan orynǵa tez arada shyqtyq. Polıtsııa, jedel járdem shaqyryldy. Rýslan Berdenov tez arada aýrýhanaǵa jetkizildi. Jasalǵan operatsııa uzaq ýaqytqa sozyldy. Qala ákimi, orynbasarlarymen operatsııa bitkenshe aýrýhanada boldyq. Operatsııa aıaqtalǵan soń ǵana taradyq. Jaǵdaıdy tolyq baqylaýda ustadyq. Polıtsııa shuǵyl áreket jasap, kúdiktini ustap, tez arada tergeý amaldaryn bastap ketti. Medıtsına qyzmetkerleri de kásibı biliktilik kórsetti. Qala ákiminiń atynan polıtsııa men medıtsına qyzmetkerlerine alǵys aıtamyn, - dedi Sársen Quranbek.

Sondaı-aq, qylmysty jasaǵan kúdiktige qatysty áleýmettik jelide shyndyqqa janaspaıtyn aqparattar tarap jatqanyn jetkizdi.

- Qazir tergeý amaldary júrip jatyr. Prokýratýra tarapynan baqylaýda. Bul adamnyń qylmysqa ne sebepti barǵandyǵyn aıta almaımyz. Aıtýǵa quqyǵymyzda, ókilettiligimizde joq. Tergeý amaldarynyń durys júrgizilýi úshin eshqandaı túsinikteme bere almaımyz. Qylmyskerdiń bul qylmysqa ne úshin barǵany jaıynda neshe túrli áńgime aıtylyp jatyr. Bizdiń bilýimizshe onyń eshqaısysy shyndyqqa janaspaıdy. Tergeý naqty málimetti beredi, - dedi Sársen Quranbek.

Aıta keteıik, Shymkentte qala ákiminiń orynbasary Rýslan Berdenovke qastandyq jasalǵan bolatyn. Kúdikti sheneýnikke qaraı úsh ret oq atqan. Oqıǵa saldarynan ákimdik qyzmetkeri jaraqat alyp, aýrýhanaǵa jetkizildi.

Al, dárigerler Rýslan Berdenovtyń ómirine qaýip tónip turmaǵanyn aıtty. Jasalǵan ota da sátti ótti.