Shymbulaqta qar kóshkinine sebepker bolǵan shańǵyshylar jazaǵa tartyla ma

ALMATY. KAZINFORM —10 naýryz kúni Shymbulaqta úsh shańǵyshy qaýipti aımaqqa kirip ketip, qar kóshkininiń júrýine sebep boldy. Kazinform agenttiginiń tilshisi olarǵa qandaı shara qoldanatynyn anyqtap kórdi.

Shańǵy bazasynyń baspasóz qyzmeti zańnamalyq deńgeıde demalys orny men kelýshiler arasyndaǵy qarym-qatynasty retteıtin normalardyń joqtyǵyn atap ótti.

Bul taýdaǵy zań buzýshylyqtarmen kúresti qıyndatyp, demalýshylar úshin qosymsha táýekelder týdyrady. Sonymen qatar, tártip buzýshylar ádette oqıǵa ornynan qashyp ketedi, óıtkeni olardy anyqtaý jáne qara tizimge engizý mehanızmi joq.

— Demalys aýmaǵynda quqyq buzýshylyqtyń aýyrlyǵyna qaraı ákimshilik jáne qylmystyq jaýapkershilikti belgileý qajet. Bul demalýshylardyń qaýipsizdigin qamtamasyz etý úshin kerek. Keshegi bolǵan jaǵdaı shara qoldanýdyń mańyzdylyǵyn taǵy bir ret kórsetti, — dep jaýap berdi «Shymbulaq» taý shańǵysy kýrortynyń ákimshiligi Kazinform agenttiginiń saýalyna.

Buǵan deıin áleýmettik jelide Shymbulaqtaǵy qar kóshkininiń vıdeosy paıda boldy.

Keıin Almaty qalalyq tótenshe jaǵdaılar departamenti kóshkinen eshkim zardap shekpegenin jetkizdi. 

Sondaı-aq Shymbulaqta qar kóshkinine sebep bolǵan shańǵyshylar anyqtaldy.