Shymbulaqta qar kóshkinine sebep bolǵan shańǵyshylar anyqtaldy
ALMATY. KAZINFORM – Shymbulaq ákimshiligi taý shańǵysy kýrortyndaǵy qar kóshkinine ákelgen jaǵdaıdyń hronologııasyn jarııalady.

– Úsh shańǵyshy eskertý belgilerin elemeı, qorshaýdy buzyp ótip, tyıym salynǵan aımaqqa shyǵyp ketken. Saldarynan qar kóshkini júrdi. Qazir olar tabylyp, kim ekeni anyqtaldy, – delingen habarlamada.
«Shymbulaq» taý shańǵysy kýrortynyń baspasóz qyzmetiniń málimetinshe, túsken qar massasynyń kólemi 95 tekshe metr.
Shańǵy kýrortynyń ákimshiligi oqıǵanyń hronologııasyn jasady:
– 10 naýryz kúni tańǵy 9:17-de qar jamylǵysy teksergennen keıin Kombı 2 aspaly joly ashyldy. Joldan tys aýmaqtar tormen jáne «Qar kóshkini qaýpi», «Jabyq», «Kirýge bolmaıdy» degen belgilermen qorshalǵan.
– 09:58 - de Shkolnık taýynda, Kombı-2 aspaly joly mańynda qar kóshkini boldy.
– 10:02-de qutqarý qyzmeti dereý oqıǵa ornyna baryp, kóshkin aımaǵyn tekserdi. Іzdestirý jumystarynyń nátıjesinde zardap shekkender men qaza tapqandar anyqtalǵan joq.
Buǵan deıin áleýmettik jelide Shymbulaqtaǵy qar kóshkininiń vıdeosy paıda boldy.
Keıin Almaty qalalyq tótenshe jaǵdaılar departamenti kóshkinen eshkim zardap shekpegenin jetkizdi.
Sondaı-aq Almaty oblysynda ózdiginen qar kóshkini júrdi.