Shymbulaqta baǵa eki esedeı qymbattady – kýrort ákimshiligi
ALMATY. KAZINFORM – Shymbulaq taý-shańǵy kýrortynda 2025 jyldyń 25 jeltoqsanynan bastap 2026 jyldyń 11 qańtaryna deıin high season tarıfi iske qosylady.
Buǵan deıin kýrortta syrǵanaýshylarǵa arnalǵan SkiPass tarıfteri tómendegideı boldy:
– Tańǵy ýaqytta (08:30–13:30): balalarǵa – 3 000 teńge, eresekterge – 11 500 teńge;
– Tolyq kún (08:30–18:00): balalarǵa – 6 000 teńge, eresekterge – 15 500 teńge;
– Túngi syrǵanaý (19:00–23:00): balalarǵa – 3 000 teńge, eresekter – 10 500 teńge.
Eki aptaǵa qoıylǵan jańa tarıfter:
– Tańǵy ýaqytta (08:30–13:30): balalarǵa – 7 000 teńge, eresekterge – 19 500 teńge;
– Tolyq kún (08:30–18:00): balalarǵa – 10 000 teńge, eresekterge – 26 000 teńge;
– Túngi syrǵanaý (19:00–23:00): balalarǵa – 8 000 teńge, eresekter – 22 000 teńge.
Medeýden Shymbulaqqa deıin aspaly arqan jolmen kóterilý qyzmetiniń quny da birshama ósken.
Nysan ákimshiliginiń málimetinshe, kýrortqa kelýshiler sany tym kóbeıgen sátte tarıfterdi kóterýi – bul álemdik tájirıbe.
– Álemde taý kýrorttarynda syrǵanaý jáne demalý arzan turmaıdy. High season tarıfi – kýrorttaǵy jaılylyq pen qaýipsizdikti qamtamasyz etý úshin klıentter sanyn naryqtyq jolmen retteýge múmkindik beretin álemdik tájirıbe, - dep málimdedi Shymbulaq.
Sondaı-aq taý-shańǵy kýrortynyń ákimshiligi qashan aqsha únemdep, syrǵanaýǵa jáne demalýǵa bolatynyn túsindirdi. Ol úshin nysanǵa high season kezeńinen basqa ýaqytta barý qajet. Bul ýaqytta jeńildigi bar tarıfter qoldanylmaıdy.
– Qarjy únemdeýdiń eń aıqyn joly – kýrortqa adam az baratyn kúnderdi tańdaý. Kóptegen halyqaralyq kýrorttar sııaqty Shymbulaq «low / regular / high season» júıesi boıynsha jumys isteıdi. Suranys tómen maýsymda syrǵanaý baǵasy orta eseppen 30%-ǵa deıin tómendeıdi, - dep habarlady kýrort.
Kýrort málimetinshe, high season kezeńinen basqa kezdegi jumys kúnderi zeınetkerler (tek Qazaqstan azamattary) jáne múmkindikteri shekteýli adamdar kýrortqa tegin kire alady. Ol úshin rastaıtyn qujattyń bolýy mindetti. Sondaı-aq kóp balaly otbasylar, ardagerler jáne basqa da áleýmettik osal toptardyń ókilderi jumys kúnderi bıletti jeńildikpen ala alady.
Eske salaıyq, bıyl 6 jeltoqsan kúni Shymbulaqta qysqy maýsym resmı túrde ashyldy.