Shymbulaqta aspaly jol toqtap qalyp, 100-ge jýyq adam evakýatsııalandy
ASTANA. KAZINFORM — Búgin teńiz deńgeıinen 3200 metr bıiktikte ornalasqan «Shymbulaq» taý-shańǵy kýrortynda «Kombı-2» aspaly joly toqtap qaldy, dep habarlaıdy TJM baspasóz qyzmeti.
Almaty qalasy TJD qutqarýshylary, TJM RJQJ jáne kýrorttyń qyzmetkerleri shuǵyl túrde kabınada qalǵan 21 adamdy alpınıstik qural-jabdyqpen túsirdi. Sonymen qatar Talǵar asýynda qalǵan shamamen 100 qonaqty qaýipsiz jerge evakýatsııalady.
Sondaı-aq, «Shymbulaq» taý-shańǵy kýrortynyń ákimshiligi kútip turǵan qonaqtar úshin ystyq sýsyndar men jylynatyn oryndar usyndy.
— Zardap shekkender joq. Aspaly jol ýaqytsha jumys istemeıdi — qalpyna keltirý jumystary júrgizilip jatyr, — delingen habarlamada.
Eske salaıyq, buǵan deıin TJD, RJQJ, Qutqarý qyzmeti jáne «Shymbulaq» arqan jolynyń mamandary tótenshe jaǵdaılarǵa uqsas stsenarııler boıynsha oqý-jattyǵýlar ótkizgen bolatyn. Osyndaı daıyndyqtyń arqasynda shynaıy jaǵdaıda qutqarý operatsııasy jedel ári qaýipsiz túrde júrgizildi.
Budan buryn Almaty qalasy mańyndaǵy Shymbulaq shatqalynda jartasta qalyp qoıǵan úsh jasóspirimdi Tótenshe jaǵdaılar mınıstrliginiń qutqarýshylary aman-esen evakýatsııalaǵanyn jazdyq.