Shymbulaqta álemniń 30 elinen kelgen 150 jýrnalıst shańǵy tepti
ASTANA. KAZINFORM – Almatydaǵy «Shymbulaq» taý-shańǵy kýrortynda SCIJ (The Ski Club of International Journalists) Halyqaralyq jýrnalıst-shańǵyshylar klýbynyń 69-shy otyrysy ótti.
QR Týrızm jáne Sport mınıstrliginiń baspasóz qyzmeti málim etkendeı, bıyl Qazaqstan uıymdastyrýshy el retinde álemniń 30-ǵa jýyq elinen kelgen 150 jýrnalısti qabyldady. Jıyndy Týrızm jáne sport vıtse-mınıstri Serik Jaraspaev ashty.
«Sizderdi erekshe is-shara – Halyqaralyq jýrnalıst-shańǵyshylar klýbynda kórgenime qýanyshtymyz. Bul tamasha is-shara túrli eldiń mamandarynyń basyn qosyp qana qoımaı, olarǵa elimizdiń biregeı sulýlyǵymen tanysýǵa múmkindik beredi», - dedi S.Jaraspaev.
3-10 naýryz kúnderi qatysýshylar úshin taý jáne shańǵy boıynsha jattyǵýlar men jarystar, kásibı taqyryptardaǵy pikirtalas, paıdaly kezdesýler jáne Qazaqstannyń mádenıeti men ulttyq taǵamdarymen tanysý ótedi. SCIJ kezekti kezdesýiniń bas seriktesi – «Kazakh Tourism» Ulttyq kompanııasy. Іs-shara Almaty qalasy ákimdiginiń qoldaýymen «Shymbulaq» taý-shańǵy kýrortynyń 70 jyldyǵy aıasynda ótip jatyr.
SCIJ halyqaralyq shańǵyshy-jýrnalıster klýby jumysyn 70 jylǵa jýyq ýaqyt boıy atqaryp keledi. Klýb quramynda álemniń 31 elinen quralǵan 3 myńnan astam ókil bar. Sol ýaqyttan beri jyl saıyn álemdegi eń úzdik taý-shańǵy kýrorttarynda klýb músheleriniń dástúrli kezdesýleri ótkizilip keledi. Jýrnalıst-shańǵyshylardy búginge deıin 74 el qabyldaǵan.
Qazaqstannyń SCIJ-degi tarıhy 2012 jyldan bastaý alady. Sol jyly elimiz alǵash ret Túrkııadaǵy klýbtyń jyl saıynǵy otyrysyna qonaq retinde qatysqan bolatyn. Al 2013 jyldan bastap úsh adamnan turatyn qazaqstandyq komanda Italııada ótken jıynda SCIJ-ke resmı túrde qabyldandy. SCIJ Kazakhstan klýby qurylǵannan beri 10 jyl ishinde qatysýshylar sany 48 adamǵa deıin ósti.
Qazaqstandyq klýbtyń negizgi maqsaty – belsendi ómir saltyn nasıhattaý, jýrnalısterdi jáne olar arqyly halyqty qysqy sport túrlerine tartý, halyqaralyq arenada Qazaqstannyń týrıstik áleýetin nasıhattaý.
