Shymbulaqqa elektrli kólikterdiń kirýine shekteý qoıylýy múmkin

ALMATY. KAZINFORM – Medeý men Shymbulaq arasyndaǵy jolda elektromobılderdiń qozǵalysyna shekteý engizilýi múmkin.

Qazirgi ýaqytta bul jolmen tek elektrokólikter jáne arnaıy tehnıkaǵa, ıaǵnı, kommýnaldyq qyzmet, jedel járdem, tótenshe qyzmetterdiń kólikterine júrýine ruqsat etilgen. Alaıda keıingi kezde aıtylǵan jolmen taýǵa kóteriletin jaıaý júrginshiler sany artqan. Týrıster kólikter júretin jolmen júrýge májbúr, bul - qaýipti. Ásirese, adamdar sany kúrt artatyn demalys kúnderi elektrli kólik pen jaıaý júrginshiler bir-birine kedergi keltiredi. Sondyqtan almatylyqtar tarapynan jeke kólikterdiń qozǵalysyn shekteý týraly usynystar áleýmettik jelide jıi aıtylyp keledi.

Osy másele boıynsha Kazinform agenttigi «Medeý» memlekettik óńirlik tabıǵı parkine júgindi. Mekeme málimetinshe, jumys kúnderi jol bógetinen orta eseppen 300-den 400-ge deıin elektrokólik ótedi, al demalys kúnderi bul san 700-ge deıin jetedi. Aıyna shamamen 15 myń kólik tirkeledi. Parktiń aýmaǵynda 20-dan astam kompanııaǵa tıesili 342 elektrli taksı bar. Sonymen qatar bir servıs arqyly 2 158 elektrokólik jumys isteıdi. Sonda barlyǵy - 2,5 myń kólik.

Kimderge kirýge ruqsat etiledi 

Medeý – Shymbulaq baǵytymen júrýge «Medeý» parkiniń derekter bazasynda tirkelgen elektromobılderge ǵana ruqsat bar. Qazirgi ýaqytta bazaǵa 15 024 elektrokólik engizilgen. Al tirkelmegen kólik ıelerine qozǵalys shektelgen.

Jaıaý júrginshiler joly jasala ma 

Memlekettik park jaýabyna sáıkes, Shymbulaqqa aparatyn jol jartastardyń arasymen ótetindikten, ony keńeıtý tehnıkalyq turǵyda múmkin emes. Qazir «Medeý» muzaıdynynyń shyǵys jaǵynan jaıaý júrginshilerge arnalǵan soqpaq salý múmkindigi qarastyrylyp jatyr.

Sondaı-aq ekologııalyq beket mańyndaǵy alańdy abattandyrý jáne bóget astynda Workout aımaǵyn qurý jumystary júrgizilip jatyr.

Qandaı shekteýler qoıylady 

— Elektromobılder sanynyń turaqty ósip kele jatqanyn eskere otyryp, olardyń kirýine shekteý engizý máselesi qaralyp jatyr. Bul sheshim adam áreketiniń tabıǵatqa tıgizetin keri áseri jáne ınfraqurylymǵa túsetin júkteme, sonyń ishinde joldyń elektrokólikterge tózimdiligi baǵalanǵan soń qabyldanady, — delingen park jaýabynda.

Eske salaıyq, buǵan deıin Shymbulaqtan Oi-Qaragai-ǵa deıin biryńǵaı týrıstik keńistik qurýdy josparlap otyrǵanyn jazǵanbyz.