Shylym suraǵany úshin poıyz bastyǵyn óltirgen aqtóbelik sot aldynda jaýap berip jatyr
AQTÓBE. KAZINFORM – Sottalýshy buǵan deıin qaraqshylyq, urlyq jasaǵany úshin sottalyp, jazalanǵan. Endi kisi óltirgeni úshin sot aldyna keldi.
Aqtóbe oblystyq qylmystyq ister jónindegi mamandandyrylǵan aýdanaralyq sotynda 28 jastaǵy aqtóbelikke aıyp taǵyldy. Ol 2019 jyly Qylmystyq kodkekstiń 192-baby 2-bóligi 4-tarmaǵy boıynsha 5 jylǵa, 2025 jyly Qylmystyq kodekstiń 188-baby 3-bóligi 3-tarmaǵy boıynsha 3 jyl aıǵa sottaldy. Sol jyly Aqtóbe oblystyq soty sot alqasynyń qaýlysymen jazasy 3 jylǵa ózgertildi. Probatsııalyq baqylaýda júrgen jazasyn óteýshi bıyl tamyzda kisi óltirdi degen kúdikke ilikti. Іs Qylmystyq kodekstiń 99-baby 2-bóligi 9-tarmaǵy boıynsha sotqa tústi.
— 2025 jyly 6 tamyz kúni saǵat shamamen 18:00–de jábirlenýshi óz áriptesterimen birge kásibı merekesin atap ótedi. Temirjolshylar otyrys kezinde ishimdik ishedi. 7-tamyz kúni saǵat 03:10 shamasynda tórteýi taksıge otyryp, qonaqúıge keledi. Sol jerge ekeýi qalyp, ekeýi úıine oralady. Qalǵan ekeýi ishke kirmeı, temirjol vokzaly mańyndaǵy alleıada otyrady. Sol kezde alleıa mańynan sottalýshy ótip, jábirlenýshiden temeki suraıdy. Ekeýi aldymen sóz talastyryp, keıin tóbelesedi. Sol kezde sottalýshy jábirlenýshiniń denesine birneshe ret jaraqat salyp, ol oqıǵa ornynda qulaıdy. Jábirlenýshi aýrýhanaǵa jetkizilgenimen esin jımastan kóz jumdy,- dep habarlady memlekettik aıyptaýshy.
Sot saraptamasynyń qorytyndysyna súıensek, jábirlenýshi kóp qan joǵaltqan. Keýde tusy tesilgen ári ókpesi men júregi jaralanǵan.
Eske salsaq, jaz aıynda jolaýshylar poıyzynyń Aqtóbe ýchaskesindegi bastyǵyn qalanyń eski bóliginde óltirip ketti. Polıtsııa qylmystyq is qozǵap, kúdiktini birden ustady.