Shylym suraǵany úshin poıyz bastyǵyn óltirgen aqtóbelik bas bostandyǵynan aıyryldy
AQTÓBE. KAZINFORM — Sot úkimimen 28 jastaǵy aqtóbelik túpkilikti 20 jylǵa bas bostandyǵynan aıyryldy. Sonymen birge 10 mln teńge moraldyq shyǵyndy óteýi kerek.
Aqtóbe oblystyq qylmystyq ister jónindegi mamandyrylǵan aýdanaralyq sotynda poıyz bastyǵynyń ólimine qatysty istiń úkimi shyqty. Sottalýshy buǵan deıin de qaraqshylyq, urlyq jasaǵany úshin sottalǵan. Bıyl ǵana № 2 Aqtóbe qalalyq sotynyń úkimimen 3 jyl 6 aıǵa bas bostandyǵynan shekteý, keıin Aqtóbe oblystyq sot alqasynyń qaýlysymen 3 jylǵa bas bostandyǵynan aıyrylǵan.
— Іs Qylmystyq kodekstiń 99-baby 2-bóligi 9-tarmaǵy boıynsha sotqa tústi. Sottalýshy aıypty dep tanylyp, 18 jylǵa bas bostandyǵynan aıyrý jazasy taǵaıyndalsyn. Qylmystyq kodekstiń 60-babyn negizge alyp, ótelmegen jazanyń bir bóligin qosyp túpkilikti 20 jylǵa bas bostandyǵynan aıyrý jazasy taǵaıyndalsyn. Jazany óteý orny — qaýipsizdigi barynsha joǵary túzetý mekemesi. Jábirlenýshiniń azamattyq talap aryzy ishinara qanaǵattandyrylyp, moraldyq shyǵyn retinde 10 mln teńge, ókildiń shyǵyny retinde 800 myń teńge óndirilsin, — dedi sýdıa J.Seıitjaparov.
Sot Alqa bılerdiń qatysýymen ótti. Sýdıa Aqtóbe oblystyq polıtsııa departamentine jeke qaýly shyǵardy. Sebebi sottalýshy Aqtóbe oblystyq sot alqasynyń qaýlysymen bas bostandyǵynan aıyrylǵan.
Eske salsaq, jaz aıynda jolaýshylar poıyzynyń Aqtóbe ýchaskesindegi bastyǵyn qalanyń eski bóliginde óltirip ketti. Polıtsııa qylmystyq is qozǵap, kúdiktini birden ustady.