Shilikti sharýalary Almatyǵa 170 tonnadan astam ónim jetkizdi
ALMATY. QazAqparat - Aýyl aımaqtaryn údemeli ekonomıkalyq damytý boıynsha pılottyq jobanyń seriktesteri 2016 jyldy qorytyndylady.
Bıyl «Shilikti sharýalary» jobasy Almaty oblysynyń 20 sharýa-kásipkerin biriktirdi. Olar bıznesti damytýǵa grant utyp aldy. Jobaǵa qatysýshylar Almaty sórelerine 173 tonna ónimin qoıdy.
«Baǵdarlama maqsaty - 0,5-ten 10-15 gektarǵa deıin jeri bar sharýalarǵa kómektesý. Bul kómekke zárý top. Negizgi mindet - sharýalarǵa kókónisterdi ósirýge, tabysyn eseleýge kómektesý», - dedi «Fılıpp Morrıs Qazaqstan» JShS syrtqy baılanystar boıynsha basqarýshysy Aıdos Smaıylov.
«Fılıpp Morrıs Qazaqstan» JShS bul jobany 2013 jyly áleýmettik jaýapkershilik aıasynda Shiliktide agroortalyq qurýdan bastaǵan.
2016 jyly sharýalar ónimdilikti arttyrý baǵytynda jumys jasady. Olar tájirıbelik alańdarda suryptardy synady, sonymen qatar kókónisterdi kútýde Florıda ýnıversıteti (AQSh) professorlary usynǵan ádister qoldanyldy. Ǵylymı usynystar qazaqstandyq ǵylymı qoǵamdastyqpen kelisildi.
Usynylǵan ádis ónimdilikti 25-30% arttyrýǵa, sonymen qatar kókónis sapasyn jaqsartýǵa septesti.
«Eńbekshiqazaq aýdanynyń jergilikti qoǵamdastyqtar qory» QQ-nyń atqarýshy dırektory Baqytgúl Elshibaeva «Shilikti sharýalary» jobasy qazaqstandyq sharýalar isiniń alǵa basýyna kómektesetinin aıtty.
