Shildeniń 5-inde Memleket basshysynyń qatysýymen «Han Shatyr» saýda oıyn-saýyq ortalyǵy ashylady
ASTANA. Maýsymnyń 11-i. QazAqparat /Marlan Jıembaı/ - Astana kúni qarsańynda, shildeniń 5-i kúni QR Prezıdenti Nursultan Nazarbaevtyń qatysýymen «Han Shatyr» saýda oıyn-saýyq ortalyǵynyń ashylý saltanaty ótedi,
dep habarlady qala ákimdiginiń baspasóz qyzmetinen.
Ortalyq ashylǵanǵa deıin ondaǵy barlyq saýda oryndarynyń 82 paıyzy jumys isteıtin bolady. Bul oraıda shildeniń 1-ine deıin óz saýda núktelerin ashatyn jaldaýshylar shilde-tamyz aılary úshin jaldaý qunynan bosatylady.
Ashylý rásimi saǵat keshki 10-da bastalyp, elimizdiń barlyq shyǵarmashylyq ujymdarynyń qatysýymen qazaq halqynyń mádenıetin, bolmysyn kórsetetin «Kóshpendiler» teatrlandyrylǵan 35-40 mınýttyq sherý ótedi. Osydan keıin ulttyq mádenı ortalyqtardyń bı ujymdary men balet ártisteri daıyndaǵan 15 mınýttyq «Kún adamdary» qoıylymy usynylady. Baǵdarlamanyń kelesi bólimi esimi álemge áıgili tanymal jáne klassıkalyq ánderdi naqyshyna keltire oryndaýshy Andrea Bochelıdiń kontsertine ulasady. Resmı ashylý aıaqtalǵannan keıin Memleket basshysy qala kúniniń qurmetine oraı merekege kelgen qonaqtardy, elimizdiń memleket qaıratkerlerin osy ortalyqta qabyldaıdy.
«Han Shatyr» ortalyǵy barlyǵy 7 qabattan turady. Onyń eń joǵary qabatyndaǵy akvasaıabaqta 2 olımpıadalyq basseın jáne jaǵajaı ornalasqan. Tereńdigi 160 sm bolatyn basseınniń jaǵajaıyna tóseletin qum arnaıy shetelden ákelingen. 6-shy qabatta Fıtnes ortalyǵy, odan tómengi qabatta SRA salondary men túrik monshalary, 4 sektorda Fastfýd jáne balalarǵa arnalǵan oıyn alańdary, odan keıingi eki qabatta dúkender men kıno zaldar ornalasatyn bolsa, ortalyqtyń jer astyndaǵy bóliginde avtoturaq oryn teppek. «Han Shatyr» ortalyǵy álemdegi shatyr pishindes qurylystardyń eń bıikteriniń biri bolmaq.
