Shildeniń 1-nen kóshi-qon zańyna engizilgen ózgerster óz kúshine endi
PETROPAVL. QazAqparat - Ázirbaıjandar men ýkraındar, monǵoldar men grýzınder jáne ózbekter men moldovandar. Bul ult ókilderi Qazaqstanda vızasyz jeke tulǵalarǵa kútýshi, qurylysshy, kúzetshi jáne úı qyzmetkeri retinde jumys isteı alady. Biraq ol úshin patent rásimdeý qajet, dep habarlady mtrk.kz.
- Shetelden bizdiń elge ýaqytsha kóship kelýshilerge saýalnama ótinish, jeke kiris salyǵy boıynsha aldyn ala tólemderdi tólegendigi týraly túbirtek, jeke basyn kýálandyratyn qujat kerek. Jáne medııtsınalyq anyqtamalar qajet, dep atap ótti SQO IID kóshi-qon polıtsııa basqarmasynyń aǵa ınspektory Mánsııa Kósheǵulova.
Aıtý kerek, buryndary dárigerden alynatyn anyqtamanyń keregi bolmaıtyn. Biraq endi aǵymdaǵy jyldyń birinshi shildesinen bastap bul qujattyń jasalýy mindet. Sheteldikter dárigerlik tolyq tekseristen elimizdiń densaýlyqsaqtaý mekemelerinde óte alady. Barlyq qujattar daıyn bolǵan kezde patent nebári bir kún ishinde rásimdeledi. Al ony uzartý ýaqyty keminde bir aı ishinde júzege asyrylýy qajet. Bıyl bul úrdiske de ózgerister engizilgen. Máselen, endi bank shotynda Qazaqstannyń shekarasynan ary asý úshin tıisti somanyń keregi joq.
- Eńbek shartynyń kóshirmesi men aldynda berilgen ruqsat qaǵazy jáne medıtsınalyq saqtandyrý qajet. Buryndary saqtandyrý quny qymbat bolatyn. Sol sebepti ýaqytty uzartý biraz qıynǵa soǵatyn. Qazir bul másele qarastyrylý ústinde. Óıtkeni onyń quny qoljetimdi bolýy kerek, - SQO IID kóshi-qon polıtsııasy basqarmasynyń bólim bastyǵy Irına Mýsına .
Sheteldikter Qazaqstan aýmaǵynda turý ýaqytyn bir jylǵa deıin ǵana uzarta alady. Al bul merzim aıaqtalǵan soń, olar el shekarasynan ketýleri tıis. Aıtý kerek, kóshi-qon zańnamasyn buzǵandarǵa úlken somada aıyppuldar qarastyrylǵan. Mysaly, úı qyzmetkerin jaldaǵan zańdy tulǵaǵa 30-dan 100 aılyq eseptik kórsetkishke deıin aıyppul salynady. Al jumysshy bolsa elden májbúrli túrde qýylýy tıis. Olaı bolmasa 10 kúnge túrmege jabylýy múmkin nemese 25 aılyq eseptik kórsetkishte aıyppul tóleýi qajet.
