Shildeden bastap salyqtyq jáne kedendik tólemderdiń Bıýdjettik synyptama kodtarynyń 50 paıyzdan astamy qysqarady
ASTANA. QazAqparat - Salyqtyq jáne kedendik tólemder boıynsha Bıýdjettik synyptama kodynyń 50 paıyzdan astamy qysqartyldy. Bul týraly búgin Astanada ótken baspasóz máslıhatynda QR Qarjy mınıstrligi Memlekettik kirister komıteti memlekettik qyzmet kórsetý basqarmasynyń basshysy Nurlan Rahymǵalıev málim etti.
«QR Biryńǵaı bıýdjettik synyptamasynyń keıbir máseleleri týraly» Qarjy mınıstriniń 2014 jylǵy qyrkúıegindegi buıryǵymen Bıýdjettik synyptama kodtaryn (BSK) qysqartý boıynsha ózgerister engizildi. Búginde Komıtettiń organdarynda 208 Bıýdjettik synyptamanyń kodtary bar. Onyń ishinde bıylǵy 1 shildeden bastap sonyń tek 89-y ǵana qalady, ıaǵnı 119 kod qysqaratyn bolady»,-dedi basqarma basshysy.
Atap aıtqanda, sonyń arasynda salyqtyq tólemder boıynsha 64 BSK saqtalady, al kedendik tólemder aıasynda 25 BSK qalady.
«Salyq tóleýshiler tarapynan shaǵymdar kóp túsetin baǵyttardy jetildirý sharalary júrgizildi. Osy turǵydaǵy jumystardyń barysynda bizdegi synyptama kodtarynyń kóp bolǵandyǵynan, tólemderdi durys aýdarmaýǵa alyp keletinin nazarǵa aldyq. Bul turǵyda keıinnen salyqtardy bir kodtan ekinshisine nemese bir aýdannan basqasyna aýdarý jáne basqa da qosymsha jumystardy týyndatady. Osy máselelerdiń barlyǵyn eskerip, BSK-ny qysqartý sheshimin jasadyq»,-dedi Rahymǵalıev.
Onyń sózine qaraǵanda, aktsızder boıynsha 68 kod qysqardy, memlekettik baj salyǵynda -21, tirkeý tólemderinde -8, jer salyǵy baǵytyndaǵy altaýy qysqartyldy.
«Salyq tóleý barysynda kóptegen úlginiń arasynan ózińizge kerek kodty tańdap júrsizder. Kodty durys tańdamasańyz, tólengen qarjy qajet emes kodpen jiberiledi. Nátıjesinde, salyq organdarynyń tarapynan sizdiń salyq tólemegenińiz jaıynda eskertýler qaıta kelip jatady. Osyndaı jaǵdaılarǵa jol bermes úshin, máselen, jer salyǵy boıynsha tek 2 kod qana qaldy»,-dedi basqarma basshysy.
Onyń aıtýynsha, BSK-nyń qysqarýy halyq pen bıznes úshin kórsetiletin memlekettik qyzmetterge ońtaıly áser berip, barlyq aqparattyq júıege júktemeni azaıtady.
