Shildeden bastap kómir qymbattaıdy, elektr energııasynyń tarıfi kóteriledi

ASTANA. QazAqparat – 1 shildeden bastap elektr energııasynyń tarıfteri ósedi. Bul týraly «Ashyq» NQA portalynda jarııalanǵan Energetıka mınıstriniń buıyryq-jobasynda jazylǵan, dep habarlaıdy QazAqparat tilshisi.

Vedomstvo túsindirmesine saı, elektr energııasynyń qymbattaýy aldaǵy kúzgi-qysqy kezeńge daıyndyqpen baılanysty.

«Ortasha alǵanda otynnyń quramdas bóligi 17% deńgeıine deıin qambattaýy boljanady. Bogatyr-Kómir óndirý ornyndaǵy kómir qunynyń ósýi kútiledi:

- 2023 jylǵy 1 qańtardan 30 maýsymǵa deıin 7%-ǵa (2 774 teńgeden 2 968 teńgege deıin);

- 2023 jylǵy 1 shildeden 31 jeltoqsanǵa deıin 5%-ǵa (2 968 teńgeden 3 092 teńgege deıin).

Jalpy, 2023 jyl ishinde tasymaldaýmen birge, kómirdiń quny orta eseppen 25%-ǵa artady», - dep jazylǵan qujatta.

Buǵan qosa, elektr energııasyn óndiretin uıymdar úshin taýarlyq gazdyń quny orta eseppen 10%-ǵa qymbattaıdy.

«Shekti tarıfti túzetý jylytý kezeńinen ótýge daıyndyq sheńberinde jóndeý jumystarynyń qajetti kólemin jabý úshin qajet. Qazirgi ýaqytta jóndeý jumystary tarıfte kózdelgen kólemde ǵana júrgiziledi. Biraq, tozý men apattylyqty tómendetý boıynsha qoıylǵan maqsattarǵa qol jetkizý úshin talap etiletin kólemde emes», - dep túsindirme berilgen buıyryq-jobasyna.

Tarıfterdiń qansha paıyzǵa qymbattaıtynyn myna silteme boıynsha ótip, kóre alasyz.

Qujat 22 mamyrǵa deıin kópshilik talqylaýda bolady.