Shildeden bastap qarjy pıramıdalary jaıly SMS arqyly eskertiledi

NUR-SULTAN. QazAqparat – 1 shildeden bastap qazaqstandyqtarǵa qarjy pıramıdalary týraly eskertetin sms-ter joldanady. Bul týraly QR Bas prokýrory Berik Asylov Májilis depýtattarynyń saýalyna bergen jaýabynda aıtty, dep habarlaıdy QazAqparat tilshisi.

«Jaqyn arada (aǵymdaǵy jyldyń 1 shildesinen bastap) qarjylyq pıramıdalardyń təýekelderi týraly sms-habarlamalar tetigi iske qosylady. Sondaı-aq, quqyq qorǵaý jəne memlekettik organdar halyq arasynda túsindirý jumystaryn kúsheıtýge baǵdarlandy. Alaıaqtyq pen qarjy pıramıdalaryna qarsy is-qımyl jalǵasady jəne erekshe baqylaýda tur», - dep jazylǵan Bas prokýrordyń depýtattarǵa joldaǵan jaýabynda.

Bas prokýratýranyń deregi boıynsha, 2020 jyly qazaqstandyqtar qarjy pıramıdalaryna 6 mlrd teńgeden astam aqsha salyp jibergen. Bul – keıingi jyldardaǵy rekordtyq kórsetkish bolyp esepteledi.

«Sońǵy 5 jylda qarjy pıramıdalary týraly isterdi tirkeý serpini turaqsyz (2017 j - 74, 2018 j - 103, 2019 j - 24, 2020 j - 180, 2021 j - 160). 2020 jyly ósim baıqalǵan. Bul kezeńde tirkelgen qylmystardyń sany 7 ese (24-ten 180-ge deıin) ósken. Keltirilgen zalaldyń somasy 6 mlrd teńgeden asty (2019 j - 1,6 mlrd teńge).

Qarjy pıramıdalarynyń saıttaryna 680 silteme buǵattaldy. Bankter operatsııalardyń kúsheıtilgen monıtorıngine jəne kúdikti klıenttermen iskerlik qarym-qatynastardy buzýǵa baǵdarlandy. Osyndaı 149 adammen iskerlik qarym-qatynas toqtatyldy jəne ony ornatýdan bas tartyldy. Mysaly, «Kaspi Bank» AQ 40 salymshyny tartyp úlgirgen «Qara qazan» qarjylyq pıramıdasynyń uıymdastyrýshylaryna qyzmet kórsetýdi toqtatty», - dep jazylǵan Bas prokýrordyń jaýabynda.

Aıta keteıik, ótken aptada Almaty qalasyndaǵy Bostandyq aýdanynyń prokýratýrasy «Astra Consulting Agensy» jáne «Alpha Lux Consulting» qarjy pıramıdalaryna qatysty qylmystyq is sotqa joldaǵanyn málim etken edi.