Shildeden bastap eń arzan temeki 710 teńge bolady

ASTANA. QazAqparat – Qarjy mınıstri Erulan Jamaýbaev «Bólshek saýdadaǵy temekiniń shekti baǵasyn belgileý týraly» buıryqqa qol qoıdy, dep habarlaıdy QazAqparat tilshisi.

«20 fıltrli, fıltrsiz sıgaretke, papırostarǵa, sıgarıllalarǵa jáne qyzdyrylatyn temekisi bar buıymdarǵa:

- 2023 jylǵy 1 shildeden bastap 2023 jylǵy 31 jeltoqsandy qosa alǵanǵa deıin 710 teńge;

- 2024 jylǵy 1 qańtardan bastap 770 teńge mólsherinde eń tómengi bólshek saýda baǵalary belgilensin», - dep jazylǵan Premer-Mınıstrdiń orynbasary – Qarjy mınıstri Erulan Jamaýbaev qol qoıǵan qujatta.

Aıta keteıik, qazir temekiniń bólshek saýdadaǵy eń tómengi quny - 650 teńge. Al, keler aıdan bastap bul soma 60 teńgege qymbattaıdy.

Vedomstvonyń túsindirmesine saı, temeki ónimderiniń bólshek saýdadaǵy shekti baǵasynyń ósýine mynalar sebep:

- 2023-2024 jyldary aktsız mólsherlemesi 14%-ǵa kóterildi;

- ımporttalatyn shıkizat pen materıaldardyń quny orta eseppen 20%-ǵa ósti;

- temeki ónimderiniń shıkizaty men komponentteriniń logıstıkasy edáýir kúrdelendi;

- 2022 jyly ınflıatsııa 20,3% qurady.

Tıisti buıryq 1 shildeden bastap qoldanysqa engiziledi.