Shildede qazaqstandyqtar dollar men eýrony kóbirek satyp alǵan
ASTANA. QAZAQPARAT - Shilde aıynda Qazaqstandaǵy aqsha aıyrbastaý oryndarynda eýro men AQSh dollaryn satý artqan, al reseılik valıýtanyń satylymy, kerisinshe, qysqarǵan, dep habarlaıdy ranking.kz .
AQSh dollaryn satý bir aıda 11,2%-ǵa artyp, 903,4 mln dollarǵa jetken bolsa, eýro - 7,2%-dy, ıaǵnı 89,7 mln-dy quraǵan. Al rýbl saýdasy 18,7%-ǵa deıin - 12,7 mlrd-qa tómendegen. Ótken jyldyń shildesimen salystyrǵanda, atalǵan úsh valıýtanyń satylymy artqany ańǵarylady - AQSh dollary 16,1%, eýro 19,5% jáne rýbl 15,0% oń kórsetkishterine ıe.
Jyl basynan beri aqsha aıyrbastaýshylar 5,2 mlrd AQSh dollaryn satqan, bul 2016 jyldyń qańtar-shilde aılaryna qaraǵanda 17,9%-ǵa kóp.
2017 jyldyń qańtar-shilde aılarynda aıyrbasshylar 643,1 mln eýro satqan, mundaǵy ósim 51,1%-ǵa teń. Reseı valıýtasynyń satylymy 2016 jyldyń alǵashqy jeti aıyna qaraǵanda 16,7%-ǵa artyp, barlyǵy 86,1 mlrd rýbl satylǵan.
Shildede AQSh dollaryn satyp alǵandardyń arasynda 413,0 mln dollarmen almatylyqtar kósh bastap tur. Bul aldyńǵy aıdaǵyǵa qaraǵanda 15,6%-ǵa, al ótken jyldyń shildesinen 16,7%-ǵa kóp degen sóz. Odan keıingi orynda 115,9 mln dollarmen OQO keledi, mundaǵy ósim maýsym aıyna qaraǵanda 32,8%-dy, byltyrǵy shildemen salystyrǵanda 22,8%-dy quraıdy. Úshtikti 104,5 mln dollarmen Astana túgendeıdi, biraq elordalyqtar aldyńǵy aıǵa qaraǵanda 1,4% az valıýta satyp alǵan, munyń ózi 2016 jyldyń shildesinen 1,9%-ǵa kóp. Osy úshtiktiń úlesine búkil eldegi AQSh dollary satylymynyń 70,1%-yna týra keledi.
Eýro satyp alý boıynsha da Almaty turǵyndary birinshi tur. Olar shilde aıynda Qazaqstandaǵy eýro satylymynyń 54,4%-yn enshilegen. Almatydaǵy aqsha aıyrbastaý oryndarynda 48,8 mln eýro satylǵan, bul maýsym aıyndaǵyǵa qaraǵanda 18,7%-ǵa, al byltyrǵy shilde aıyndaǵy saýdadan 18,2%-ǵa kóp.
Ekinshi orynda 15,9 mln eýromen Astana tur. Mundaǵy bir aılyq ósim 4,9%-ǵa, jyldyq ósim 5,1%-ǵa teń. QR úlesi - 17,7%-dy quraıdy.
Eýro satý kóshbasshylarynyń úshtigin Qaraǵandy oblysy túgendeıdi - 5,4 mln eýro satylǵan aımaqtaǵy ósim maýsym aıymen salystyrǵanda 8,0%-ǵa, byltyrǵy shildege qaraǵanda 55,9%-ǵa teń. QR úlesi - 6,0%.
Reseı rýbliniń satylymy respýblıkamyz aımaqtarynda birshama birkelki júrip jatyr. Atap aıtqanda, úzdik úshtiktegi Almaty, ShQO jáne Astananyń úlesine jalpy satylym mólsheriniń 35,6%-y týra keledi. 2017 jyldyń shildesinde eń kóp rýbl satyp alǵan - Almaty turǵyndary. Alaıda jalpy kórsetkish 1,83 mlrd bolǵanmen, bir aıda 20,1%-ǵa tómendegen, al jyldyq keri kórsetkish 0,6%-ǵa teń. Odan keıingi ShQO-daǵy aqsha aıyrbastaýshylar 1,41 mlrd rýbl, ıaǵnı aldyńǵy aıdaǵydan 18,4% az, al byltyrǵydan 24,3% kóp satqan. Joǵaryda tilge tıek etkenimizdeı, úshtikti túgendep turǵan Astanada 1,28 mlrd rýbl satylǵan, bul maýsym aıyndaǵydan 20,4%-ǵa az, biraq ótken jylǵy shildedegi saýdadan 1,7%-ǵa kóp degen sóz.
