Shildede Qazaqstandaǵy aýa raıy qandaı bolady
NUR-SULTAN. QazAqparat - Sınoptıkter shilde aıynda aýa raıy qandaı bolatynyn aıtty, dep habarlaıdy QazAqparat Qazgıdrometke silteme jasap.
Shilde aıynda sınoptıkalyq jaǵdaı jıi ózgeredi: batys antıtsıklondary kelip, ońtústik tsıklondary ketedi.
Aıdyń basynda soltústik óńirlerge Skandınavııa aýdandarynan tsıklon yǵysady, onymen birge daýyldy jel soǵady. Jańbyr, keı jerlerde nóser jaýyn jaýady, sondaı-aq burshaq, naızaǵaı jáne daýyl túrindegi konvektıvti qubylystar kútiledi.
Eldiń soltústiginde, soltústik-batysynda jáne ortalyǵynda aýa temperatýrasy kúndiz +17 +26ºS-qa deıin tómendeýi múmkin. Ońtústikte qatty ystyqtan keıin aýa temperatýrasy +25 +33ºS-qa deıin tómendep, nóser jańbyr jaýady. Birinshi onkúndiktiń sońyna qaraı aýa temperatýrasy birtindep joǵarylaı bastaıdy.
Ekinshi jáne úshinshi onkúndikte synap baǵanasy soltústik, ortalyq pen shyǵysta túnde +10 +15ºS-tan +15+20ºS-qa deıin, kúndiz +25 +30ºS-tan +30 +38-qa deıin qubylady.
Respýblıkanyń ońtústik, ońtústik-shyǵys jáne batysynda túnde +15 +20ºS-tan +20 +30ºS-qa deıin, kúndiz +30 +38ºS-tan +35 +45ºS-qa deıin aýytqıdy.
