Shildede Qazaqstan aýmaǵynda bir ǵana elektromobıl tirkelgen
ASTANA. QazAqparat - 2018 jyldyń 7 aıynda Qazaqstanda 700 myńnan astam avtokólik tirkeýge qoıyldy. Bul týraly «QazAvtoÓnerkásip» avtokólik salasyndaǵy kásiporyndar odaǵy málim etti, dep habarlaıdy QazAqparat.
«Esepti kezeńde ákimshilik polıtsııa organdary tirkeýge 735 539 avtokólikti qoıdy. Atalǵan kórsetkish ótken jyldyń sáıkes kezeńinen 14,7 paıyzǵa artyq. Onyń ishinde 691 084-i ekinshi ret tirkelgender úlesinde, ıaǵnı bir adamnan ekinshi adamnyń atyna aýystyrylǵan kólikter sanatyna jatqyzyldy. Ósim 2017 jylmen salystyrǵanda 13,8 paıyzǵa jetti. Al alǵash ret tirkelgen kólik quraldarynyń sany 44 455-ti qurady. Ol byltyrǵa qaraǵanda, 30 paıyzǵa joǵary boldy», - dep atap kórsetilgen taratylǵan málimette.
Aıta keteıik, bıylǵy shildede tirkeýge qoıylǵan kólikter sany 113 myńnan asty. Sonymen qatar, shilde aıynyń nátıjesi boıynsha Qazaqstan aýmaǵynda jalǵyz elektromobıl tirkeldi. ıAǵnı, Tesla Model 3 modeli Astana qalasynyń turǵynyna tıesili boldy.
«QazAvtoÓnerkásiptiń» habarlaýynsha, bıyldyń basynan beri qaıta tirkelgen kólikterdiń úshten ekisin (69,2 paıyzy) paıdalaný merzimi 10 jyldan asqan kólikter qamtyǵan. Onyń ishinde 20 jyldan asqandardyń úlesi 273 482 kólik (39,6 paıyz) bolsa, 11-den 20 jylǵa deıingiler 29,6 (204 674 kólik) paıyzdy qurady.
Al 4-ten 7 jylǵa deıin - 140 801 (20,4 paıyz), 8-den 10 jylǵa deıin - 38 257 (5,5 paıyz), 1-den 3 jylǵa deıingi kólikter sany 31 169-ǵa jetti. Sonymen qatar paıdalaný merzimi 1 jylǵa jetpegen kólikterdiń úlesi 2 701 boldy.
Kelisimshart rásimderine qaraǵanda, otandyq avtoparktiń eskirýiniń turaqty úrdisi baıqalýda. Osy oraıda naryqta 20 jyldan asqan kólikti qaıta satý kórsetkishi 35,9 paıyzdan (2017 jylǵy qańtar-shilde) esepti kezeńde 39,6 paıyzǵa deıin ósken. Al paıdalaný merzimi 1-3 jyl aralyǵyndaǵy avtokólikter 8,2 paıyzdan 4,5 paıyzǵa deıin qysqardy.
