Shildede qant baǵasy 65 paıyzǵa ósti
ASTANA. QazAqparat - 2016 jylǵy shildede azyq-túlik taýarlarynyń baǵasy 2015 jylǵy sáıkes kezeńmen salystyrǵanda 15,9 paıyzǵa ósti. Bul týraly QR Ulttyq ekonomıka mınıstrliginiń baspasóz qyzmetinen habarlandy.
Sonymen, qant baǵasy 65,4 paıyzǵa, jarmalarǵa - 40,4 paıyzǵa, kofe, shaı jáne kakaoǵa - 31,3 paıyz, maı jáne toń maıǵa - 28,6 paıyz, nanǵa - 27,1 paıyz, kondıterlik ónimderge - 22,4 paıyz, balyq jáne teńiz ónimderine - 21,5 paıyz, jemister men kókónisterge - 20,7 paıyz deńgeıinde , toqash jáne un ónimderine - 17,3 paıyzǵa, sondaı-aq makaron ónimderine - 16,7 paıyzǵa, unǵa - 12,4 paıyzǵa, alkogoldi ishimdikterge - 11,8 paıyzǵa, sút ónimderine - 8,3 paıyzǵa joǵarylady.
«Atalǵan kezeńde et jáne et ónimderi baǵasynyń ósimi 6,3 paıyzdy qurady. Qus etine baǵa deńgeıi 16,1 paıyzǵa, shujyq ónimderine - 8,9 paıyzǵa, sıyr etine - 4,4 paıyzǵa, shoshqa etine - 2,8 paıyz deńgeıinde, qoı etine - 2,3 paıyz, jylqy etine - 1,5 paıyzǵa joǵary boldy»,-delingen mınıstrlik málimetinde.
Aıta keteıik, tamaq ónimderiniń baǵasyn tirkeý menshiktiń barlyq nysanyndaǵy saýda kásiporyndarynyń irikteme jelisi boıynsha jáne Qazaqstannyń iri qalalaryndaǵy qalalyq bazarlarda júzege asyrylady.
