Shildede elordada Islam Davosy ótedi
ASTANA. QazAqparat - Búgin elordada «Astana» halyqaralyq qarjy ortalyǵy men Dúnıejúzilik ıslam ekonomıkalyq forýmynyń qory arnaıy kelisimge qol qoıdy. Atalǵan kelisimge sáıkes shilde aıynyń basynda elordada XIV Dúnıejúzilik ıslam ekonomıkalyq forýmy ótedi, dep habarlaıdy QazAqparat.
«Memleket basshysynyń bastamasyna sáıkes 2018 jyldyń 1 qańtarynan bastap «Astana» halyqaralyq qarjy ortalyǵy jumys isteı bastady. Elbasynyń sheshimimen qarjy ortalyǵynyń halyqaralyq tanystyrylymy shildeniń 4-5 kúnderi ótedi. Onyń ishinde 4 shildede «Astana» HQO-nyń tusaýkeseri aıasynda 14-shi Dúnıejúzilik ıslam ekonomıkalyq forýmyn ótkizýge ýaǵdalastyq. Ony bizdiń áriptesterimiz Islam Davosy dep te ataıdy. Júzdegen halyqaralyq sarapshy, bıznes kapıtandary, ıslam qarjysy ındýstrııasynyń, ıslam ekonomıkasynyń kóshbasshylary Qazaqstanǵa kelip, ózderiniń jetistikteri jaıynda aıtyp, tájirıbelerimen bólisedi dep kútip otyrmyz», - dedi qol qoıý rásiminen keıin BAQ ókilderine suhbat bergen Qaırat Kelimbetov.
Onyń aıtýynsha, buǵan deıin Islam Davosy sammıtteri Malaızııa, Birikken Arab Ámirlikterinde, sonymen qatar Ulybrıtanııada ótkizilgen.
«Biz Ortalyq Azııada, osy óńirde qarjylyq habtyń, onyń ishinde ıslamdyq qarjylandyrý salasynda búkil eýrazııalyq keńistikte kóshbasshysy bolǵymyz keledi. 200 mıllıon adamdyq naryq ıslamdyq qarjy ındýstrııasy úshin zor bolashaq dep esepteımiz. Búginde sáıkesinshe, zańnamalyq aktiler qabyldap, ıslamdyq qarjylandyrý boıynsha keńes qurdyq», - dedi ol.
