Shildede elimizdegi ortasha aılyq jalaqy 82 myń 282 teńgeni qurap, byltyrmen salystyrǵanda 18 paıyzǵa ósti
ASTANA. Qyrkúıektiń 10-y. QazAqparat /Qanat Mámetqazyuly/ - 2010 jylǵy shilde aıynda elimizdegi bir qyzmetkerdiń ortasha aılyq ataýly jalaqysy 82 myń 282 teńgeni qurady jáne ótken jylǵy tıisti aımen salystyrǵanda 18,0 paıyzǵa, naqty kóriniste - 10,6 paıyzǵa ósti.
Statıstıka agenttiginiń taratqan málimetterine qaraǵanda, salalyq qurylymda eń joǵary jalaqy burynǵysynsha qarjy jáne saqtandyrý qyzmetinde - 160,7 myń teńge (ortasha respýblıkalyq deńgeıden 1,9 esege asady), ken óndirý ónerkásibi jáne karerlerdi qazýda - 151,9 myń teńge (1,8 ese), kásibı, ǵylymı jáne tehnıkalyq qyzmette - 143,2 myń teńge (1,7 ese), aqparat jáne baılanysta - 130,7 myń teńge (1,6 ese) shamasynda saqtalyp otyr. Al eń tómengi jalaqy aýyl, orman jáne balyq sharýashylyǵyndaǵy qyzmetkerlerge tıesili eken. Atalǵan salalardaǵy jalaqy 35,1 myń teńgeni quraıdy, bul respýblıka boıynsha qamtylǵan kórsetkishten orta eseppen 57,3 paıyzǵa az.
Al óńirlik bóliniste eń joǵary jalaqy Atyraý oblysynda saqtalyp otyr. Bul óńirdegi jalaqy - 154,0 myń teńge, bul ortasha respýblıkalyq kórsetkishten 1,9 esege asady. Sondaı-aq, Soltústik Qazaqstan oblysynda jalaqynyń shamasy 54,7 myń teńgeni quraǵan, bul el boıynsha ortasha deńgeıden 33,5 paıyzǵa tómen kórsetkish.
