Shildede Astanaǵa tartylatyn gaz qubyrynyń qurylysy bastalady
«Memleket basshysynyń besinshi áleýmettik bastamasynyń arqasynda ortalyq jáne soltústik óńirlerge, onyń ishinde Astanaǵa gaz tartý máselesine sheshim qabyldandy. Búginde «Saryarqa» magıstraldy gaz qubyry qurylysynyń jobasy boıynsha tehnıkalyq-ekonomıkalyq negizdeme aıaqtaldy. Sonymen qatar, bul qujat aıasynda memlekettik saraptamanyń ońtaıly qorytyndysy berildi. Gaz qubyrynyń qurylysyna bıylǵy shildede kirisý josparlanyp otyr», - dedi Q. Bozymbaev úkimettik emes uıym ókilderimen kezdesý barysynda.
Osy oraıda mınıstr magıstraldy gaz qubyry birinshi kezeńiniń barlyq jumystary 2019 jyldyń jeltoqsanyna deıin aıaqtalatynyn atap ótti. Birinshi kezeńdegi «Qyzylorda-Jezqazǵan-Qaraǵandy-Temirtaý-Astana» jelisiniń quny 267,3 mlrd teńgege baǵalandy. Osy oraıda, gaz qubyry tartylatyn aralyq 1 081 shaqyrymǵa sozylady, al qubyrdyń dıametri 820 mıllımetrge teń.
«Bul kórsetkishterdi tehnıkalyq-ekonomıkalyq negizdemege súıenip aıtyp otyrmyn. Alaıda jobalyq-smetalyq qujatnama ázirlenip qoıdy. Osyǵan baılanysty, qazirgi kezde ol memlekettik saraptamadan ótip jatyr. Atap aıtqanda, kórsetkishter ózgerýi múmkin, sebebi qubyr baǵdary azdap qysqarady, osy oraıda keıbir aralyqtarda qurylys arzandaıdy. Meniń oıymsha, bir aıdan keıin osy baǵyttaǵy esep-qısap birshama túzetýli yqtımal», - dedi Qanat Bozymbaev.
