Shildede Astana fızıkanyń álemdik ordasyna aınalady
ASTANA. QazAqparat - 13-21 shilde kúnderi Astanada fızıka páni boıynsha halyqaralyq olımpıada ótedi.
Bul týraly búgin Astanada QR Bilim jáne ǵylym mınıstri Aslan Sárinjipovpen kezdesý barysynda fızıka páni boıynsha halyqaralyq olımpıadaǵa qatysatyn Qazaqstannyń ulttyq qurama komandasynyń jattyqtyrýshysy Ernur Rysmaǵambetov málim etti.
«Astanada 13-21 shilde kúnderi aralyǵynda fızıka páni boıynsha 45-shi halyqaralyq olımpıada ótedi. Resmı túrde International physics Olympiad dep atalatyn jarys ótken ǵasyrdyń 60-shy jyldarynan beri ótkizilýde. Ol - álem boıynsha fızıkadan ótetin dodalardyń eń bedeldisi. Onyń jeńimpazdary dúnıejúziniń kez kelgen bedeldi ýnıversıtetterine túse alady», - dedi E.Rysmaǵambetov.
Onyń aıtýynsha, atalmysh olımpıadany ótkizýge úmit bildirgen birneshe elder arasynda úlken talas júrgizilgen. Degenmen Japonııa, Ońtústik Koreıa, Sıngapýr, Reseı jáne AQSh elderi arasynan bul qurmet Qazaqstanǵa buıyrdy.
«Ádette bul quqyqty olımpıadalarda úzdik nátıjelerge qol jetkizip júrgen elderge, qajetti ınfraqurylymy men bazasy bar memleketterge beredi. Qazirgi ýaqytta biz álem boıynsha eń úzdik 20 eldiń qataryndamyz. 2013 jyly bizdiń qurama Kopengagende ótken fızıka páni boıynsha olımpıada jarystaryna qatysqan bolatyn. Sol kezde uıymdastyrýshylar Qazaqstan quramasyna olımpıadanyń jalaýyn ustatty. Atalmysh tý qazir Astanada. Olımpıadany ótkizip jatqan qala resmı túrde fızıkanyń álemdik astanasy dep atalady», - dedi ol.
