Shilde aıyndaǵy teńge baǵamyna ne áser etti
«Munaı naryǵyndaǵy ahýal álemdik valıýta naryǵyndaǵy ahýal sııaqty shildede ekiushty jáne qubylmaly boldy. OPEK+ elderiniń ýaǵdalastyqtary týraly jáne koronavırýstyń delta shtamynyń taralý qarqyny týraly jańalyqtar aıasynda munaı baǵasy birese kóterilip, birese tómendep otyrdy. Aıdyń qorytyndysy boıynsha munaı bir barrel úshin 76,33 AQSh dollaryna deıin 1,6%-ǵa ósti», - dedi Álııa Moldabekova.
Onyń aıtýynsha, shildede teńge baǵamy munaı baǵasynyń ósýi jáne Aqsha-kredıt saıasaty jónindegi komıtettiń bazalyq mólsherlemeni +/- 1,00 p.t. paıyzdyq dálizimen jyldyq 9,25% deńgeıine deıin 0,25%-ǵa kóterý týraly qabyldaǵan sheshimi aıasynda 424,45 teńgege deıin 0,7%-ǵa qalypty túrde nyǵaıdy. Mólsherlemeniń kóterilýi ishki valıýta naryǵynda teńgerimdi ustap turýǵa ári syrtqy ınvestorlar úshin teńgelik aktıvterdiń tartymdylyǵyn saqtaýǵa yqpal etetin qosymsha faktor bolyp sanalady.
«Shildede valıýta bırjasynda teńge-dollar jubymen saýda-sattyq kóleminiń maýsymdaǵy 3,16 mlrd AQSh dollarymen salystyrǵanda 3,09 mlrd AQSh dollaryna deıin birshama tómendeýine qaramastan, saýda-sattyqtyń ortasha kúndik kólemi bıylǵy jyldyń basynan bastap ortasha deńgeıden edáýir joǵary: qańtar-maýsym aralyǵyndaǵy kezeńde 129 mln AQSh dollarymen salystyrǵanda 155 mln AQSh dollary deńgeıinde saqtalýda. Bul shetel valıýtasyna jetkilikti joǵary suranystyń saqtalýyn kórsetedi. Aldyńǵy suhbattarda atap ótkenimdeı, shetel valıýtasyna suranys ekonomıkalyq belsendiliktiń turaqty qalpyna kelýine jáne ımporttyń, eń aldymen, tutynýshylyq taýarlardyń ósýine baılanysty. Máselen, bıylǵy birinshi jartyjyldyqta taýarlar ımporty 9,2%-ǵa ósip, 17,5 mlrd AQSh dollaryna jetti. Tutynýshylyq taýarlar ımporty 27%-ǵa nemese
1,2 mlrd AQSh dollaryna, onyń ishinde azyq-túlikke jatpaıtyn taýarlar ımporty 36%-ǵa nemese 1,1 mlrd AQSh dollaryna ósti», - dedi UB ókili.
Budan basqa, jazǵy kanıkýl men demalys maýsymyna baılanysty jeke tulǵalar tarapynan maýsymdyq suranys faktory baıqalady. Sońǵy qoljetimdi derekterge sáıkes, aıyrbastaý pýnktterinde qolma-qol shetel valıýtasyn satyp alý mamyrdaǵy 368 mln AQSh dollarynan maýsymda
555 mln AQSh dollaryna deıin ósti.
Degenmen, valıýta naryǵynda teńgerimsizdik baıqalǵan joq. Ulttyq bank valıýtalyq ınterventsııalardy júzege asyrmady. Bıýdjetke transfertterdi júzege asyrý úshin Ulttyq qor qarajatyn konvertatsııalaý kólemi 1,1 mlrd AQSh dollaryn, al kvazımemlekettik sektor tarapynan valıýtany satý 479 mln AQSh dollaryn qurady.
«Sheteldik ınvestorlardyń Qazaqstannyń MBQ-daǵy portfeldik ınvestıtsııalarynyń kólemi shildede 791 mlrd teńgeden 822 mlrd teńgege deıin ósti, bul beırezıdentterdiń teńgedegi aktıvterge qyzyǵýshylyǵynyń saqtalǵanyn kórsetedi. Tamyzdyń basynan bastap delta shtamnyń taralýy men munaı baǵasynyń tómendeýi aıasynda teńge bir dollar úshin 425,53 teńge deńgeıine deıin 0,3%-ǵa álsiredi», - dedi Álııa Moldabekova.