Shilde aıynda teńge 1,5%-ǵa álsiredi

NUR-SULTAN. QazAqparat – Shilde aıynda teńgeniń dollarǵa qatysty baǵamy 477,07 teńgege deıin – 1,5%-ǵa álsiredi. Bul týraly QR Ulttyq banki tóraǵasynyń orynbasary Aqyljan Baımaǵambetov aıtyp berdi, dep habarlaıdy QazAqparat tilshisi.

«Teńgeniń aıyrbastaý baǵamyna, damýshy naryqtardyń valıýtalaryna jasalǵan qysym AQSh Federaldy rezervtik júıesiniń aqsha-kredıt saıasatynyń belsendi túrde kúsheıýine jáne dollar baǵamynyń jahandyq nyǵaıýyna yqpal etti. Álemdik ekonomıkanyń perspektıvasyna qatysty alańdaýshylyq kezinde munaı baǵasyn belgileý barreline 100 dollardan tómen tústi», - dedi Aqyljan Baımaǵambetov Úkimettiń búgingi otyrysynda.

Sonymen birge, ishki faktorlar arasynda demalys kezeńi men dıvıdendter tóleý jaz aılarynda shetel valıýtasyna suranystyń maýsymdyq ósýine yqpal etken.

«Bıylǵy qańtar-shilde aılarynda kvazımemlekettik sektor sýbektileriniń valıýtalyq túsimdi satýy, Ulttyq qordan respýblıkalyq bıýdjetke transfertterdi qamtamasyz etý úshin valıýtany satý jáne QR Ulttyq bankiniń valıýtalyq ınterventsııalary teńgege qoldaý kórsetken. Álemniń jetekshi ortalyq bankteriniń mólsherlemelerdi belsendi túrde arttyrýyna jáne álemdik ekonomıka perspektıvalaryna qatysty qaýipter damýshy elder valıýtalarynyń, onyń ishinde teńgeniń qubylmalylyq faktorlary bolyp otyr», - dep túsindirdi A. Baımaǵambetov.

Aıta keteıik, bıylǵy shildede jyldyq ınflıatsııa 15%-ǵa deıin ósti, oǵan azyq-túlik baǵasynyń kóterilýi eń kóp úles qosty.