Shilde aıynda kúnkóristiń eń tómengi deńgeıi 19 202 teńgeni qurady
ASTANA. QazAqparat - 2015 jylǵy shildede elimizdegi kúnkóristiń eń tómengi deńgeıiniń shamasy 19 202 teńgeni qurady. Bul rette negizgi tamaq ónimderin tutynýdyń eń tómengi normalarynan eseptelgen orta eseppen halyqtyń jan basyna shaqqandaǵy kúnkóristiń eń tómengi deńgeıiniń shamasy 2015 jylǵy shildede ótken aımen salystyrǵanda 2,4 paıyzǵa, 2014 jylǵy shildemen - 2 paıyzǵa tómendegen. Bul týraly Ulttyq ekonomıka mınıstrliginiń Statıstıka komıtetinen habarlandy.
Statıstıkalyq málimetterge qaraǵanda, kúnkóris deńgeıiniń qurylymynda et pen balyqty satyp alýǵa jumsalǵan shyǵystardyń úlesi 21,6 paıyz, sút, maı jáne toń maı ónimderi men jumyrtqany - 16,2 paıyz, jemister men kókónisterdi - 12,2 paıyz, nan jáne jarma ónimderin - 8 paıyz, qant, shaı jáne dámdeýishterdi - 2 paıyzdy quraǵan.
Sonymen qatar, kúnkóris deńgeıiniń qurylymyndaǵy azyq-túlik taýarlarynyń úlesi 11 myń 521 teńgeni, al azyq-túlik emes taýarlar men aqyly qyzmetter úlesi 7 myń 681 teńgeni quraǵan.
