Shilde aıynda Qazaqstanda bokstan Azııa chempıonaty ótedi

ASTANA. QazAqparat – Shildede Astana qalasynda Jastar men jasóspirimder arasyndaǵy bokstan Azııa chempıonaty ótedi, dep habarlaıdy QazAqparat Azııa boks konfederatsııasynyń baspasóz qyzmetine (ASBC) silteme jasap.

«Azııa boks konfederatsııasy basshylyǵy bıyl jastar men jasóspirimder arasyndaǵy Azııa chempıonaty Qazaqstanda, Astanada 14-30 shilde aralyǵynda ótetinin rastady. Qazaqstan boks federatsııasy buǵan deıin Azııa chempıonatyn 2016 jyly Pavlodarda ótkizgen bolatyn. Jeti jyldyq úzilisten keıin negizgi oqıǵa elimizge qaıta oralmaq.

Jastar men jasóspirimder arasyndaǵy bokstan Azııa chempıonaty týraly barlyq aqparat, komanda delegatsııasy tizimi, ótinim úlgisi men kestesi ulttyq federatsııalar úshin jaqyn arada daıyn bolady. Jastar arasyndaǵy chempıonatqa 2005 jáne 2006 jyly týǵan boksshylar qatysady. Al 2007 jáne 2008 jyly dúnıege kelgen balalar jasóspirimder arasyndaǵy jarysta baq synaıdy», - delingen ASBC habarlamasynda.