Shilde aıynda elimizdegi jumyssyzdar sany 498 100 adamdy qurady
ASTANA. Tamyzdyń 11-i. QazAqparat /Gúlmıra Álıakparova/ - Shilde aıynda elimizdegi jumyssyzdar sany 498 100 adamdy qurap, jumyssyzdyq 5,7 paıyz deńgeıinde boldy.
Bul týraly QR Statıstıka agenttiginen málim etti.
2010 jylǵy shildede respýblıka ekonomıkasyna jumyldyrylǵan halyqtyń sany 8,2 mıllıon adamdy qurady. Ótken jyldyń atalmysh kezeńimen salystyrǵanda olardyń sany 248 myńǵa nemese 3,1 paıyzǵa kóbeıdi. Sonymen birge, esepti kezeńde elimizdegi jaldamaly qyzmetkerlerdiń sany 5,4 mıllıon adamdy quraǵan. Bul
jumyspen qamtylǵandardyń 66,1 paıyzy bolyp otyr.
Qazaqstan Respýblıkasy Eńbek jáne halyqty áleýmettik qorǵaý mınıstrliginiń jumyspen qamtý organdarynda 2010 jylǵy shildeniń sońynda 71,7 myń adam resmı tirkelgen. Jumyssyzdar retinde tirkelgenderdiń úlesi ekonomıkalyq turǵydan belsendi halyqtyń 0,8 paıyzyn qurady (2009 jylǵy shildede - 1,2 paıyz).
Sondaı-aq baǵalaý boıynsha shilde aıynda ekonomıkalyq belsendi halyq arasynda jasyryn jumyssyzdyq 0,4 paıyzdy qurady.
Aıta keteıik, jasyryn jumyssyzdyq bul - jumysshylardyń tolyq emes kún tártibine aýystyrylýy, ne bolmasa olardyń eńbekaqysy saqtalmaı jartylaı tólenip ákimshilik demalystarǵa jiberilýi. Al jumyssyzdarǵa - tabys beretin jumystary bolmaǵan, biraq ony belsendi izdegen jáne oǵan kez kelgen ýaqytta kirisýge ázir turǵan tulǵalar jatady.
