Shilde aıynda elimizdegi ınflıatsııa deńgeıi aıtarlyqtaı ózgergen joq -G. Marchenko
ALMATY. Tamyzdyń 11-i. QazAqparat /Erbol Azanbek/ - QR Statıstıka agenttiginiń resmı derekteri boıynsha elimizdegi ınflıatsııa deńgeıi shilde aıynda 0,2 paıyz boldy.
Bul týraly búgin Almatyda ótken baspasóz máslıhatynda QR Ultyq bankiniń tóraǵasy Grıgorıı Marchenko málim etti.
Ótken aıda azyq-túlik taýarlarynyń baǵasy ózgerissiz qalyp, azyq-túlikke jatpaıtyn taýarlar baǵasy 0,3 paıyzǵa, aqyly qyzmet kórsetý 0,2 paıyzǵa qymbattady. Azyq-túlik taýarlary naryǵynda ótken aıda et jáne et ónimderi, temeki buıymdary - 0,6 paıyz, maı jáne toń maı, jarma buıymdary 0,4 paıyzǵa qymbattaǵan. Jumyrtqa baǵasy - 5,0, jemis-kókónis ónimderi - 1,2, kúrish - 0,5, sút ónimderi 0,4 paıyzǵa tómendegen. Al azyq-túlikke jatpaıtyn taýarlar tobynda kóbinese, dári-dármekter baǵasy - 0,4, úı qajetine arnalǵan buıymdar men jeke bas gıgıenasy taýarlary 0,3 paıyzǵa ósken. Benzınniń baǵasy - 0,5, dızel otyny - 0,1 paıyzǵa joǵarylaǵan. Aqyly qyzmet kórsetý qurylymynda turǵyn úı-kommýnaldyq salada qyzmet kórsetýge aqy tóleý 0,3 paıyzǵa qymbattap, baılanys qyzmetin kórsetý baǵasy 3,9 paıyzǵa tómendegen. G. Marchenko bul kórsetkishtermen shildedegi jalpy ınflıatsııa deńgeıin ótken aımen salystyrǵanda ózgerissiz dep baǵalýǵa bolady, dedi.
Jalpy shildeniń qorytyndylary boıynsha ınflıatsııa jyldyq kórsetkishte 6,7 paıyzdy qurady. Azyq-túlik taýarlarynyń baǵasy 5,3 paıyzǵa, azyq-túlikke jatpaıtyn taýarlar - 6,2 paıyzǵa, aqyly qyzmet kórsetý 9,0 paıyzǵa ósti. Jyl basynan bergi 7 aıdyń qorytyndysy boıynsha ınflıatsııa 4,6 paıyz deńgeıinde qalyptasqan.
