Shıkizattyq emes eksport kólemi 23,4% ósti
ASTANA.KAZINFORM – 2026 jyldyń qańtar–naýryz aılarynda shıkizattyq emes taýarlar boıynsha syrtqy saýda aınalymy 20,4 mlrd AQSh dollaryn qurap, ótken jyldyń sáıkes kezeńimen salystyrǵanda 13,5%-ǵa ósti. Bul týraly QR Saýda jáne ıntegratsııa mınıstrliginiń bıylǵy jyldyń birinshi toqsanyndaǵy syrtqy saýda kórsetkishteriniń qorytyndysynda kórsetilgen.
Ondaǵy lerekterge qaraǵanda, shıkizattyq emes eksport kólemi birden 23,4%-ǵa artyp, 6,9 mlrd AQSh dollaryna jetti.
-Bul kórsetkishter syrtqy saýda qurylymyndaǵy sapaly ózgeristerdiń kúsheıip kele jatqanyn ańǵartady.
Shıkizattyq emes eksporttyń negizgi draıverleri mys pen mys katodtary, kúmis, ýran, ferroqorytpalar, mal azyǵyna arnalǵan ónimder jáne kúnbaǵys maıy boldy. Atap aıtqanda, kúnbaǵys maıynyń eksporty shamamen 60%-ǵa ósip, 277,8 mln AQSh dollaryna jetti. Bul qazaqstandyq qaıta óńdelgen agroónerkásip ónimderiniń halyqaralyq naryqtaǵy básekege qabilettiliginiń artyp kele jatqanyn kórsetedi. Al ferroqorytpalar eksportynyń 20,1%-ǵa ulǵaıýy metallýrgııa salasynyń nyǵaıyp, otandyq ónerkásip ónimderiniń eksport geografııasynyń keńeıip kele jatqanyn dáleldeıdi,-delingen habarlamada.
Sondaı-aq onda Qazaqstannyń syrtqy saýda geografııasy ártaraptandyrylǵan qurylymyn saqtap otyrǵany aıtylǵan.
Birinshi toqsan qorytyndysy boıynsha Qytaı 7,8 mlrd AQSh dollaryn quraǵan taýar aınalymymen jáne jalpy syrtqy saýda kólemindegi 23,8% úlesimen elimizdiń eń iri saýda seriktesi boldy. Reseı 6,5 mlrd AQSh dollaryn quraıtyn saýda kólemimen ekinshi oryndy saqtap, ımport pen ónerkásiptik kooperatsııa baǵytyndaǵy negizgi áriptesterdiń biri bolyp qaldy. Sonymen qatar Italııa, Túrkııa jáne Ózbekstan da Qazaqstannyń iri saýda seriktesteri qatarynan kórindi. Italııamen aradaǵy taýar aınalymy 3,4 mlrd AQSh dollarynan asyp, onyń ishinde qazaqstandyq eksport kólemi 3 mlrd AQSh dollarynan joǵary boldy.
Osyǵan deıin bıylǵy birinshi toqsanda syrtqy saýda aınalymy 32,9 mlrd AQSh dollaryna deıin ulǵaıǵany týraly jazdyq
