Shıkizatty shıkizat kúıinde satyp jiberý jeńil bolyp tur – Májilis depýtaty

ASTANA. KAZINFORM – Shıkizattan qosylǵan quny joǵary ónim alýdy jolǵa qoıý kerek. Bul týraly BIZDIÑ ORTA podkastynda Májilis depýtaty Murat Ergeshbaev aıtty.

- Kómir zııan degen soń odan qashqaqtap otyrmyz. Al álemde áli paıdalanyp jatyr ǵoı. Jańa tehnologııalar bar. 2000 jyldary Germanııada bolǵanbyz. Olar kómirmen jumys isteıtin jylý elektr ortalyqtaryn jaýyp bastady. Endi qaıtadan soǵan kósheıin dep jatyr. Sol kezde JEO-laryna barǵanymyzdy aq halatpen tap-taza bolyp júredi. Al qazir tehnologııa tipti damyp ketken ǵoı. Sony paıdalanýymyz kerek. Qudaıǵa shúkir kómirimiz bar. Biraq bizge shıkizat kúıinde satyp jiberý jeńil bolyp tur, qınalmaısyń, - dedi ol.

Májilis depýtaty bıdaıdy da shıkizat kúıinde eksportqa shyǵaryp otyrǵanymyzǵa alańdaýshylyq tanytty.

- Bıdaı ma, bıdaı kúıinde satyp jiberemiz. Nege bıdaıdan qosylǵan quny joǵary ónim almaımyz? Bıdaıdyń ózinen 27 ónim túri shyǵady eken. Qyrǵyzstan 3 un tartý zaýytyn salyp aldy. Al bıdaıdy bizden alyp otyr. Olar bıdaı ımportyna 0 paıyz, unǵa 10 paıyz mólsherleme qoıǵan. Nege? Sebebi salǵan 3 zaýyty jumys isteýi kerek. Undy Aýǵanstan, Ózbekstan, Tájikstanǵa eksporttaıtynmyz. Endi Ózbekstan ózi de bıdaı egip, naryqtan ketip jatyr. Degenmen, áli de bıdaıdy bizden arzan baǵamen alady, - dedi Murat Ergeshbaev.

Aıta keteıik, buǵan deıin otandyq shıkizatty óńdeýde jergilikti kásiporyndarǵa basymdyq berilýi tıis ekeni habarlandy.