Shıkizatty el ishinde qaıta óńdeýge mindetteıtin normalar Parlament qaraýyna engiziledi
Jaqyn arada Ónerkásip jáne qurylys mınıstrligi shıkizatty el ishinde qaıta óńdeýge mindetteıtin normalardy Parlament qaraýyna engizedi. Bul týraly atalǵan vedomstvonyń basshysy Qanat Sharlapaev málim etti, dep habarlaıdy Kazinform.
«Shıkizatty ishki óńdeýshilerge (sonymen qatar 15 iri serpindi jobany iske asyrý baǵytynda) jetkizý mehanızmin iske qosý úshin aýqymdy jumys atqaryldy. Bul turǵyda erikti úshjaqty shart aıasynda negizgi alıýmınıı, mys jáne qorǵasyndy jetkizýge 25 kelisimge qol qoıyldy», - dedi Q.Sharlapaev Senattyń jalpy otyrysynan keıin Kazinform tilshisine bergen jaýabynda.
Onyń aıtýynsha, osy baǵytta shıkizatty ishki naryqtaǵy óndiristerge jetkizýge ekpin qoıylyp otyr.
«Munymen qosa, Memleket basshysynyń óńdeý ónerkásibin jetkilikti kólemde jáne tıisti baǵadaǵy shıkizatpen qamtamasyz etý jónindegi tapsyrmasyn oryndaý maqsatynda shıkizat óndirýshi men qaıta óńdeýshi arasynda kelisimderdi mindetti túrde bekitý tetigi pysyqtalyp jatyr. Jańa tásil shıkizatty elden tys jerlerge áketýden góri el ishinde qaıta óńdeýdiń basymdyǵyn eskerip otyr. Bul másele zańnamalyq bekitýdi talap etedi. Qazir atalǵan jumystar atqarylyp jatyr jáne jaqyn arada biz óz usynystarymyzben Parlamentke júginetin bolamyz», - dedi mınıstr.
Eske salsaq, jaqynda senator Súıindik Aldashev elimizdegi óńdeý ónerkásibiniń problemalaryn kóterdi.
«Jobalardy josparlaý jáne iske asyrý barysynda joǵaryda atalǵan bazalyq, iske asyrý jáne marketıngtik problemalar qalaı eńseriledi? Senatorlarda Úkimet 15 serpindi jobany júzege asyrýǵa daıyn ba degen suraq bar», - dedi senator.
