Shıkizattyń bir bóligin ishki naryqta jeńildetilgen tártipte satý kerek – depýtat
Depýtattyń aıtýynsha, iri jer qoınaýyn paıdalanýshylar el ishinde óńdeýdi damytýǵa múddeli emes. Óndirilgen alıýmınııdiń 87 paıyzy, mystyń 99 paıyzy, qorǵasynnyń 77 paıyzy elden eksporttalady. Alaıda lokalızatsııa tómen deńgeıde qalyp otyr.
«Óndiriste ımporttyq shıkizat pen quramdas bólikter basym. Máselen, memlekettiń kúshti qoldaýyna qaramastan, Qazaqstannyń mashına jasaý ónimderine degen suranysynyń 80%-dan astamy quramdas bólikterdi shetelden jetkizý esebinen qamtamasyz etiledi. Farmatsevtıka ónerkásibindegi ımport úlesi – 63%, jıhaz – 55%, elektrondy ónimder – 40%», - dedi Sh. Buqtuǵutov Úkimet basshysy Álıhan Smaıylovtyń atyna joldaǵan saýalynda.
Senator sondaı-aq ónerkásiptik saıasat pen memlekettik qoldaý tetikteriniń jetildirilmegendigin, bul óńdeý ónerkásibiniń qarjy ınstıtýttary úshin tartymsyz bolyp qalýyna ákelip soǵatynyn atap ótti. Máseleni sheshý úshin senator birqatar naqty usynystar aıtty.
«Zańnamaǵa ózgerister men tolyqtyrýlar engizý jáne jer qoınaýyn paıdalanýshylardy shıkizattyń bir bóligin ishki naryqta tıimdi sharttarmen satýǵa baǵyttaýdy usynamyz. Arnaıy ekonomıkalyq jáne ındýstrııalyq aımaqtar aıasynda memlekettik qoldaýdy alyp otyrǵan nemese jeńildikteri bar kompanııalar úshin ózara mindettemeler belgilenýi kerek. Indýstrııalyq damý qorynyń qyzmetin óńdeýshi ónerkásipti damytýdy yntalandyrý baǵytyna ózgertý mańyzdy. Joǵary tehnologııalyq ónim shyǵaratyn kásiporyndarǵa memlekettik qoldaýdy shoǵyrlandyrý qajet. Sonymen qatar, taýarlardy qaıta bólý deńgeıin baǵalaý ádistemesin qaıta qarap, ony salalardyń jáne tutastaı alǵanda ekonomıkanyń naqty jaǵdaıyna sáıkestendirý mańyzdy», - dedi depýtat.
