Shıkizattyq sektorǵa orynsyz «qarǵys» aıta berýdiń qajeti shamaly - A. Esentúgelov
A. Jeltoqsannyń 10-y. QazAqparat /Qanat Mámetqazyuly/ - Shıkizattyq sektorǵa udaıy orynsyz «qarǵys» aıta berýdiń qajeti shamaly. Búgin «Ekonomıkalyq zertteýler ınstıtýty» AQ-nyń ashyq esik kúni sharasy barysynda atalǵan ınstıtýttyń qurmetti professory Arystan Esentúgelov osylaı aıtty,
dep habarlaıdy QazAqparat.
Jıyn barysynda A. Esentúgelov «Ekonomıkalyq zertteýler ınstıtýty» AQ-nyń qurylý tarıhyna baılanysty áńgime qozǵady. Onyń paıymdaýynsha, osydan 40 jyldaı buryn qurylǵan zertteý ınstıtýtynyń tarıhyn Qazaqstan ekonomıkasynyń tarıhy retinde qarastyrǵan oryndy.
«Instıtýt qoldanbaly zertteýlerdi júzege asyryp, árqashan ǵylymı jumystarmen aınalysty, jyldyq-besjyldyq josparlardy boljady. Árıne, Keńes odaǵy kezeńinde memlekettik jospardy qorǵaý ońaıǵa túsken joq. Degenmen de, kóptegen sharalar oryndaldy. Táýelsizdik alǵannan keıin de bizde úlken óndirýshilik qýat boldy. Árıne, bunyń negizgi bóligi shıkizattyq sektordy qurady. Osy rette toqtala ketetin jaıt, men shıkizatqa qatysty udaıy orynsyz «qarǵys» aıta berýdiń qajeti shamaly dep aıtar edim. Óıtkeni 90-jyldardaǵy daǵdarystan da, qazirgi álemdik daǵdarystan da eń aldymen osy sektordyń arqasynda basqa elderge qaraǵanda az zardap shegip otyrmyz. Árıne, bul baǵytta birshama olqylyqtar bar, biraq osy sektordyń ekonomıkaǵa septigin umytpaý qajet», dedi A. Esentúgelov.
