Shıkizattyq emes sektorlar ekonomıkany damytýdyń negizgi faktoryna aınalady - Úkimet saǵaty
ASTANA. 4 naýryz. QazAqparat - Ekonomıkany damytýdyń negizgi faktory syrtqy jáne ishki ınvestıtsııalardyń ósýi, ásirese ekonomıkanyń shıkizattyq emes sektorlarynan bolady dep sanaımyn.
Búgin Májilistegi Úkimet saǵatynda Ekonomıka jáne bıýdjettik josparlaý mınıstri Erbolat Dosaev osylaı málim etti.
Mınıstrdiń paıymynsha, aldaǵy kezeńderde jańa tikeleı ınvestıtsııalardy tartý jáne kapıtaldy syrtqy naryqtardan izdeý - ekonomıkalyq saıasattyń basymdylyǵy bolmaq. «Osy maqsatta memlekettik-jeke menshik áriptestik úderisin jandandyrý, baqylaý-ruqsat berý júıesi tájirıbesin ońtaılandyrý qarastyrylǵan. Investorlar úshin Qazaqstannyń tartymdylyǵyn arttyrý maqsatynda Ekonomıkalyq damý jónindegi yntymaqtastyq uıymynyń ózindik standarttary negizinde ınvestıtsııalyq ahýaldy jaqsartý jumystary júrgiziletin bolady», - deıdi Erbolat Dosaev.
Onyń sózine qaraǵanda, memlekettik-jeke menshik áriptestiginiń damýyna, ásirese, Elbasy tapsyrmasy boıynsha qolǵa alynatyn jańa aýqymdy ınfraqurylymdyq jobalardy iske qosýmen baılanysty salalarǵa úlken úmit artylady.
