Shıkizattyq emes sala úshin tikeleı ınvestıtsııalar qoryn qurýdy qarastyrý kerek – Elbasy

ASTANA. QazAqparat - Shıkizattyq emes salada iri jobalardy júzege asyrý úshin sheteldik ınvestorlarmen teń qarjylandyrý qaǵıdatymen jumys isteıtin tikeleı ınvestıtsııalar qoryn qurýdy qarastyrý kerek. Bul týraly Memleket basshysy Nursultan Nazarbaev Qazaqstan halqyna arnaǵan Joldaýynda atap ótti, dep habarlaıdy QazAqparat tilshisi.

«Shıkizattyq emes salada iri jobalardy júzege asyrý úshin sheteldik ınvestorlarmen teń qarjylandyrý qaǵıdatymen jumys isteıtin tikeleı ınvestıtsııalar qoryn qurý máseleni qarastyrý kerek. Bul salaǵa shamamen 300 mlrd teńgege tarta qarajat bólinsin. Qarajattyń qandaı kózderden alynatynyn biz birge sheshemiz. Osyny qolǵa alsaq, teń qarjylandyrý boıynsha transulttyq kompanııalarǵa qarjy quısaq, onda olar bul jumysqa belsene kirisedi. Solaı ǵoı, Asqar Uzaqbaıuly, (QR Premer-Mınıstriniń birinshi orynbasary Asqar Mámın - avt.). Bul - sonyń usynysy. Men ony qabyldaımyn», - dedi Nursultan Nazarbaev.

Aıta keteıik, QR Prezıdenti Nursultan Nazarbaev osy ýaqytta Aqordada Qazaqstan halqyna Joldaýyn jarııalaýda. Strategııalyq qujat elimizdiń áleýmettik-ekonomıkalyq damýynyń ózekti máselelerine jáne qazaqstandyqtardyń ál-aýqatyn odan ári arttyrý mindetterine arnalǵan.