Shıkizattyq emes eksport kólemin 2025 jyly 2 esege deıin arttyrý basty mindet
ASTANA. QazAqparat - Seısenbide ótken Úkimet otyrysynda kóktemgi egis jumystaryn júrgizýge daıyndyq barysy jáne 2016 jyldyń qorytyndysy boıynsha ındýstrııalyq-ınnovatsııalyq damý memlekettik baǵdarlamasyn iske asyrý jaıy qaraldy.
Osyǵan baılanysty barlyq aýyl sharýashylyq jerleri tıimdi paıdalanylýy kerek. Bıýdjette egistik úshin qarastyrylǵan qarajat qatań túrde maqsatyna laıyq baǵyttalýy tıis, bul tuqymdardy sýbsıdııalaýǵa da qatysty.
Úkimet basshysy óziniń orynbasary, aýyl sharýashylyǵy mınıstri A.Myrzahmetovke Energetıka mınıstrligimen birlese otyryp aýyl sharýashylyǵy óndirýshilerin dızeldik otynmen qamtamasyz etý máselesin baqylaýǵa alýdy tapsyrdy. Sonymen qatar, QazAgro holdıngine aqshalaı qarajatty ýaqytyly bólý jáne aýyldyqtar úshin onyń qoljetimdiligin qamtamasyz etý tapsyryldy.
Otyrystyń ekinshi jartysynda Úkimet ındýstrııalyq-ınnovatsııalyq damý memlekettik baǵdarlamasynyń 2016 jylǵy iske asyrylý nátıjesin qarady. Investıtsııalar jáne damý mınıstri Jeńis Qasymbektiń aıtýynsha, barlyǵy baǵdarlama men ony iske asyrý boıynsha sharalar josparynda 4 maqsatty ındıkator jáne 10 nátıjeler kórsetkishi qarastyrylǵan. Baǵdarlamada josparlanǵan 10 nátıjeler kórsetkishiniń 2016 jyl qorytyndysy boıynsha 8-i júzege asyrylǵan. Nátıjesinde dástúrli sektorlardaǵy kásiporyndardy jańǵyrtý esebinen qoldanystaǵy óndiristerdi jańǵyrtý men keńeıtý boıynsha elimizdiń 7 óńirinde jalpy somasy shamamen 68,7 mlrd. teńge bolatyn 10 joba iske asyrylǵan. Jalpy, ótken jyldyń qorytyndysy boıynsha, baǵdarlamanyń ındıkatorlar men nátıjeler kórsetkishiniń júzege asyrylý deńgeıi 84,6%-ti quraǵan. Al baǵdarlamanyń is-sharalar josparyn oryndaý deńgeıi 97,6 protsentti qurady.
Jalpy, baǵdarlamany iske asyrýda 2016 jylǵa arnalǵan nátıjelerdi oń dep baǵalaýǵa bolatynyn ulttyq ekonomıka mınıstri Tımýr Súleımenov te alǵa tartty.
Premer-mınıstr Memleket basshysy óz Joldaýynda ındýstrııalandyrý máseleleriniń mańyzdy rólin kórsetkenin, Qazaqstannyń úshinshi jańǵyrýyn iske asyrýǵa baılanysty tapsyrma júktegenin atap ótti. Bizge ındýstrııa 4.0 elementterin engizýmen qatar, ónerkásiptiń bazalyq salalaryn tehnologııalyq qaıta jaraqtandyrý boıynsha aýqymdy ári kóp eńbekti talap etetin jumys jasaý qajet, dedi B.Saǵyntaev.
Sonymen qatar, Premer-mınıstr eńbek ónimdiligin odan ári arttyrý máselelerine basa nazar aýdarýdyń jáne qazirdiń ózinde salalyq mınıstrlikter men óńir ákimdikterimen birlesip kásiporyndarmen birge núktelik jumystarǵa kirisý qajettigin aıtty.
Premer-mınıstr qazirgi sátte Úkimettiń ınvestıtsııalardy tartý júıesin ózgertý boıynsha jumystar júrgizip jatqanyn jáne bıylǵy jyldyń maýsym aıynyń sońyna deıin ınvestıtsııalardy tartý boıynsha ulttyq strategııa ázirlenetinin, sonymen qatar biryńǵaı aqparattyq-monıtorıngtik júıe engiziletinin atap ótti. Bul sharalar ınvestıtsııalyq ahýaldy jaqsartýǵa baǵyttalǵan.
Sonymen qosa, B.Saǵyntaev jumys kórsetkishteriniń biri ınvestorlarǵa usynýǵa bolatyn pysyqtalǵan jańa jobalar bolýy tıis ekenine nazar aýdardy. Osyǵan oraı, ındýstrııalandyrý basymdyqtaryna saı keletin jobalardy sapalyq turǵydan irikteýge erekshe kóńil bólý qajet.
Sonymen qatar, Premer-mınıstr Memleket basshysy Úkimet aldyna shıkizattyq emes eksport kólemin 2025 jylǵa qaraı 2 esege deıin arttyrý týraly mindet qoıǵanyn aıtty. Qoıylǵan mindetti júzege asyrý eksporttyq qoldaý júıesin «qaıta júkteý» boıynsha júrgiziletin jumystardy eskerýmen jáne jalpy ekonomıkanyń basym salalarynda básekege qabiletti eksporttyq óndiristerdi damytýmen júzege asyrylýy tıis.
Premer-mınıstrdiń birinshi orynbasary A.Mamınge atalǵan máselelerdi baqylaýda ustaý jóninde tapsyrma berildi.
