Shıkizat rentasy arqyly azamattardy jemqorlyqpen kúreske tartýǵa bolady – Marat Qaıyrlenov

NUR-SULTAN. QazAqparat – Ekonomıka ǵylymdarynyń kanıdaty, Ulagat Konsalting Grupp dırektory Marat Qaıyrlenov QazAqparat tilshisine sybaılas jemqorlyqpen kúrestiń jańa tolqynynda qandaı sharalardy qolǵa alý kerektigi týraly pikirin aıtty.

«Bizdiń ekonomıkamyzda kúni búginge deıin «qol tıgizýge bolmaıtyn» iri kompanııalardyń aıtarlyqtaı shoǵyry bar. Tekserýshi organdardyń eshbiri olardy teksere almaıtyn. Ókinishke qaraı, osy «qol tıgizýge bolmaıtyn» sanat ekonomıkanyń qaterli isigine aınaldy», - deıdi ekonomıst.

Sarapshynyń aıtýynsha, mundaı «qaterli isikti» emdeýde damýshy elderdiń tıimdi tásilderi bar.

«Baqylaý-qadaǵalaý organdarynyń jumysyn kúsheıtýden bólek, BAQ-tyń múmkindigin keńeıtý kerek. Damyǵan elderdiń bárinde jemqorlyqpen kúreste BAQ-tyń róli joǵary. ıAǵnı, buqaralyq aqparat quraldarynyń aqparatqa qol jetkizý múmkindikterin keńeıtý qajet. Óıtkeni jýrnalısterden jaltarý jaǵy bizde qatty óris alǵan. Saýaldaryna jaýap bermeıdi, berse de ústirtin, qasań málimetpen qutylady degen sııaqty. Kompanııalardy qoıyp, sheneýnikterdiń ózi BAQ týraly, Aqparatqa qol jetkizý týraly zańdardyń talaptaryn buzady. Keıbireýlerge eleýsiz kóringenimen, BAQ-tyń zań buzý faktilerin anyqtaýdaǵy róli óte joǵary», - deıdi Marat Qaıyrlenov.

Sondaı-aq, jemqorlyqpen kúreske qoǵamdy tartýdyń tıimdi tásili bar ekenin eske saldy.

«Baqylaý-qadaǵalaý organdary Prezıdenttiń tapsyrmasynan keıin kenet jaqsy jumys isteýge kirisip, shetinen áshkereleı bastaıdy dep úmittenýge bolatyn shyǵar. Tipti talap etý kerek. Biraq olardyń da resýrsy shekteýli. Sondyqtan, barynsha ashyqtyq bolsa, BAQ-tyń jumysynda erkindik bolsa, jemqorlyqpen kúres nátıjelirek bolar edi.

Úshinshi shara – turǵyndardy tartý. Eger memleket ár qazaqstandyqqa shıkizat rentasyn tólese, halyq árbir shyǵyndy, túsetin salyqty muqııat qadaǵalaıtyn bolady. Halyq shıkizat saýdasynan túsken salyq onyń qaltasyna túsetin aqshaǵa tikeleı áser etetinin túsingende ekonomıkaǵa sergek qaraı bastaıdy.

Mine, baqylaý, qadaǵalaý sharalary osyndaı úsh deńgeıli bolý kerek dep oılaımyn. Birinshi kezekte baqylaý-qadaǵalaý organdarynyń kirshiksiz jumysyn, ekinshi kezekte BAQ-tyń erkin jumysyn, úshinshi kezekte qoǵam múmkindikterin birdeı iske qosý kerek», - dedi ekonomıst.

Foto: egemen.kz