«Shyǵystan Batysqa deıin»: Almatyda 100-den astam qýyrshaq qoıylǵan kórme ashyldy
ALMATY. KAZINFORM — Qazaqstan Respýblıkasy Memlekettik ortalyq mýzeıinde kollektsııalyq qýyrshaqtar kórmesin ashyldy.
Kórmede «Art Dolls Collection_KZ» shyǵarmashylyq odaǵynyń quramyna kiretin Almaty, Astana, Jarkent qalalarynan jınalǵan 21 sheber 140 avtorlyq jumysyn usynyp otyr. Bul is-shara kóktem men jańarýdyń merekesi — Naýryz meıramy aıasynda ótkizilip otyr.
«Shyǵystan Batysqa deıin» kórmesiniń ashylýyna Almatynyń belgili sýretshileri, galerısteri, kásipkerleri jáne qala turǵyndary qatysty. Uıymdastyrýshylardyń aıtýynsha, kórmeniń maqsaty — almatylyqtar men qala qonaqtaryna elimizdegi talantty sheberlerin jáne olardyń biregeı jumystaryn tanystyrý.
— Qazaqstannyń birneshe qalasynan kelgen sheberlerdiń kórmesi ashyldy. Qala turǵyndary men qonaqtary 3 sáýirge deıin ony tamashalaı alady. Búgingi is-shara aıasynda qýyrshaq avtorlary alǵys hatpen marapattaldy. Men ózim uıymdastyrýshylyqtan bólek búgingi kórmedegi avtorlardyń birimin. Osy kórmege arnaıy ázirlep, eki qýyrshaq ákeldim. Olar: Esik «Altyn adamy» men Úrjar abyzy. Bul qýyrshaqtar Astanadaǵy Ulttyq mýzeıdiń katalogy boıynsha jasaldy. Іs-shara Naýryz merekesine oraılastyra ótkizilip otyrǵandyqtan munda qazaqy naqyshtaǵy qýyrshaqtar kóp, — dedi kórme uıymdastyrýshysy Tatıana Fısenko.
Al kórmege 10 qýyrshaq ákelgen Janna Janaeva qýyrshaq jasaý protsessi qalaı júretinin atap ótti. Aıtýynsha, bir týyndyny ázirleýge keminde 1 aı ketedi.
— Men negizi qazaqtyń ulttyq kıimderimen qýyrshaq jasaımyn. Alaıda ózge de týyndylarym bar, mysaly búgin «Mońǵol qyzy» atty qýyrshaǵymdy ákelip otyrmyn. Ony jasaýyma Abaı atyndaǵy opera balet teatryndaǵy jańa «Han Sultan» qoıylymy sebep boldy. Jalpy qýyrshaq jasaý protsessi osyndaı ıdeıa týyndaǵan sátten bastalady. Odan keıin qýyrshaqtyń temir qańqasyn quramyz. Bet-júzi men qol-aıaǵyn sheberler balqytylǵan plastık dep ataıtyn materıaldan jasaımyz. Sosyn kıim-keshegin tigip, bárin biriktiremiz. Qýyrshaqtyń kólemine baılanysty ýaqyty ártúrli, biraq kem degende 1 aı ketedi, — dedi ol.
Sonymen qatar Janna Janaeva qýyrshaq jasaýǵa qalaı kelgenin aıtyp berdi. Ol bul ónerdi úırený úshin sheteldik sheberlerden tálim alǵan.
— Meniń qýyrshaq jasap júrgenime 7 jyldan asty. Maǵan bul salaǵa kelý jeńildeý boldy, óıtkeni arhıtektor retinde bilimim bar. Birde jýrnaldan kórip, qýyrshaq jasaǵym keldi. Sóıtip sheteldik mamandardy Almatyǵa shaqyryp, ózimiz shetelge baryp úırendik. Sebebi bizde jaqsy mamandar joqtyń qasy boldy. Jalpy qýyrshaq jasaý óneri arzan dúnıe emes. Sondyqtan biz kóbine ony satýǵa emes, adamdar tamashalap, baǵalaýy úshin jasaımyz, — dedi ol.
Qýyrshaq sheberi kórmede qoıylǵan týyndylardyń baǵasy kólemine qaraı 500 myńnan bastalatynyn atap ótti. Aıtýynsha, kórmeniń alǵashqy kúni-aq qýyrshaq alýǵa birneshe adam nıet bildirgen.
Eske salaıyq, buǵan deıin Almatyda Jeńistiń 80 jyldyǵyna arnalǵan kórme ashylǵanyn jazǵanbyz.