Shyǵystaǵy týrızm: tabıǵaty ásem, biraq ınfraqurylym aqsap tur
ASTANA.KAZINFORM — Respublica partııasynan saılanǵan Májilis depýtaty Ekaterına Smolıakova jumys saparymen Shyǵys Qazaqstan oblysynda júr. Sapar barysynda ol ishki týrızmniń jaı-kúıin zerttep, jergilikti kásipkerlermen jáne turǵyndarmen kezdesedi. Bul týraly Májilistiń baspasóz qyzmeti habarlady.
Qatonqaraǵaı men Úlken Naryn aýdandarynda Ekaterına Smrlıakova birqatar kezdesý ótkizip, Buqtyrma sý qoımasynyń jaǵalaýyn aralady. Sondaı-aq oblystyq Kásipkerler palatasynyń týrızm keńesimen salanyń ózekti máselelerin talqylady. Olardyń qatarynda bas jospardyń bolmaýy, jaryqtyń jıi óshýi, ınternet pen baılanys sapasynyń tómendigi, ınfraqurylymnyń álsizdigi jáne tabıǵatqa uqypty qaraý mádenıetiniń jetkiliksizdigi sııaqty jaıttar bar. Bul faktorlar tabıǵı jáne ekonomıkalyq áleýeti zor óńirde týrızmniń damýyn tejep otyr.
– Kásipkerler ınvestıtsııa salýǵa daıyn, týrıster kelgisi keledi. Biraq qaı jerde qurylys júrgizýge bolatyny, qandaı nysandar josparlanǵany belgisiz. Jaryq joq, ınternet nashar. Máselen, Úlken Naryndaǵy vızıt-ortalyqta, mysaly týrıster arnaıy izdeıtin jergilikti bal, pantokrın, qaıyń qabyǵynan nemese sazdan jasalǵan buıymdar múlde joq. Al týrıster ózimen birge Altaıdan estelik, syılyq alyp ketkisi keledi. Bul – óńirdi ilgeriletýdiń mańyzdy quraly, – dedi depýtat.
Onyń aıtýynsha, memleket tarapynan baǵdarlamalar men qoldaý sharalary bolǵanymen, ShQO-nyń týrızm áleýeti áli tolyq júzege asyrylmaǵan. Qazaqstanda tabıǵat, mádenıet, týrıstik oryndar jetkilikti bolsa da, sońǵy tórt jylda týrızmniń JІÓ-degi úlesi 3,7%-dan 3,2%-ǵa tómendegen. Bul – álemdik ortasha deńgeıden shamamen úsh ese tómen jáne klımaty uqsas kórshi elderdiń kórsetkishterinen de qalyp qoıady.
– Dúnıejúzinde týrızm – bul jumys oryndarynyń 10 paıyzy, eksporttyń 30 paıyzy, ınvestıtsııanyń 7 paıyzy. Bizde de oǵan barlyq múmkindik bar. Júıeli sharalar men sapyly serpilis qajet, – dedi Ekaterına Smolıakova.
Buǵan deıin depýtat Mańǵystaý jáne Almaty oblystarynyń týrıstik aımaqtarynda da bolyp, ınfraqurylym, qyzmet kórsetý, ekologııa jáne týrızmdi ilgeriletý máselelerin kótergen. Shyǵys Qazaqstanda da jumys jalǵasýda: alda áli de turǵyndarmen jáne kásipkerlermen kezdesýler ótedi. Olardyń usynystary aldaǵy ýaqytta Parlamentte qaralatyn bolady.
Aıta ketelik depýtat Naýryz Saılaýbaı týrızmdi damytýǵa óz kúshin jumsap júrgen azamattardyń múddesi qorǵalýy tıis ekenin aıtqan edi.